भगवान गौतम बुद्धं निर्वाण जुइगु स्वला न्ह्यः माघपुन्हि (सिल्लापुन्हि) कुन्हु निर्वाण तिथि घोषणा याःगु दिंयात लुमंकाः श्रीखण्ड तरुमूल महाविहारं शाेभायात्रा पिकायेत्यंगु दु । जीवन संस्कार त्याग यायेगु दिं कथं बौद्ध धर्मावलम्बीपिन्सं थुगु दिंयात नखःया रुपय् हना वयाच्वंगु दु ।

येँया बसन्तपुरय् च्वंगु श्रीखण्ड तरुमुल महाविहार, सिखमूबहालय् वंगु दँ निसें माघपूर्णिमा (सिल्लापुन्हि) कुन्हु भगवान बुद्धं जीवन व संस्कार त्याग याःगु दिं हना वयाच्वंगु दु । यात्रा येँया बसन्तपुर, कास्ठमण्डप, चिकंमुगः, जैसेदेगः, ज्याबहाः, लगं, ब्रम्हत्वाः, हुमत थ्यंकाः अनं लिपा कोहिति, भीमसेनस्थान, मरुत्वाः, प्याफः, यटखा, नरदेवी, त्यंगः, बाङ्गेमुडा, न्हायकंतला, असं, केलटोल, वंघ, मखं, हनुमानध्वाखा जुया वसन्तपुर थ्यंका सामपन जुइ ।

वंगु दँ आयु परित्यागया दिनय् बसन्तपुरं विशेष रुपं सजावट यानातःगु बुद्धमूर्तियात थीथी सांस्कृतिक ब्वज्या नापं पिकयाः नगर परिक्रमा याःगु खः । ज्याझ्वःया संयोजन इन्जिनियर डिल्लीरत्न शाक्यं यानादिगु दु ।

गौतम बुद्धं २९ दँया उमेरय् थःगु गृह त्याग याना ३५ दँया बैशय् बैशाख पुन्हिया चान्हय् बोधिज्ञान प्राप्त यानाः वैशाख पुन्हि हे महानिर्वाण जूगु जनविश्वास दु । आयु सँस्कार परित्याग धाःसा महापरिनिर्वाण जुइ स्वला न्ह्यः याःगु बाैद्ध ग्रन्थय् उल्लेख यानातःगु दु ।