प्रतिनिधिसभाया बैठक थाैं शुक्रवाः नं जारी दु । न्हिनय् १ ता इलय् संघीय संसद भवन न्हू बानेश्वरय् न्ह्याःगु थौंया बैठकय् स्वंगू एजेण्डा न्ह्यःने हःगु दु । बैठकय् उद्योग व वाणिज्य अथेहे श्रम व उपभोक्ता कल्याण समितिया नायः अब्दुल खानं विद्युतीय वाणिज्य विधेयक २०८१ या समिति प्रतिवेदन न्ह्यब्वइगु जूगु दु । अथे हे कानुन मन्त्री अजयकुमार चौरसियां ​​कानून, न्याय व मानवअधिकार समितिया प्रतिवेदनलिसें विधान विधेयकयात कयाः सहलह यानाः विधान विधेयक पारित यायेगु प्रस्ताव तइगु जूगु दु । बैठकय् अन्तर्राष्ट्रिय श्रम संगठनया अन्तर्राष्ट्रिय सम्मेलनं पारित याःगु न्हूगु अन्तर्राष्ट्रिय श्रम मापदण्डया संयन्त्र (सम्मेलन, प्रोटोकल व सुझाव) सम्बन्धी श्रम, रोजगार तथा सामाजिक सुरक्षामन्त्री शरदसिंह भण्डारीया प्रतिवेदन दुथ्याकेगु ज्याझ्वः दु ।

अध्यादेश निर्णयया नितिं पेश यायेगु धाःसा कार्यसूचीइ दुथ्याःकातःगु मदु । प्रतिनिधिसभाय् कांग्रेस व एमालेया जक सहज बहुमत दुसां नं सरकारयात राष्ट्रियसभा पाखें अध्यादेश पारित यायेत जसपाया समर्थन अझ नं माः । बैठकया निंतिं क्वःछिनातःगु एजेण्डा कानूनमन्त्री अजयकुमार चौरसियाया इनापय् चीकूगु खः । जनता समाजवादी पार्टी नेपालं अध्यादेशयात कयाः निर्णय मयाःगु धाःसें चीकुगु खः । तर बैठक न्ह्यः जसपां निर्णय याःगु खःसा अध्यादेश निर्णयया नितिं पेश यायेगु धकाः कार्यसूचीइ छगू बुँदा थप याय् फइगु न्ह्यथंगु दु ।