सर्वोच्च अदालतया दकलय् वरिष्ठ न्यायाधीश सपना प्रधान मल्लं न्यायाधीश नियुक्तिइ राजनीतिक प्रभाव म्हो यायेमाःगु खँ धयादीगु दु । सन् २००१ या बैशाखय् तत्कालीन प्रधानमन्त्री केपी ओलीं संसद विघटनया विरुद्ध फैसला याःबलय् थःत प्रधानन्यायाधीश दयेके मखु धकाः ख्याच्वः वःगु न्ह्यथनादिल ।

येँया तीनकुनेय् हिमालयन ह्वाइटहाउस इन्टरनेशनल कलेजया ग्वसालय् जूगु ‘ह्वाइटहाउस साहित्य महोत्सव’या समापन सत्रय् न्ववासें वय्कलं उगु खँ धयादीगु खः । कलेजया कानूनया विद्यार्थीपिंलिसे नं अन्तरक्रिया यानाः ‘न्याय व अन्याय’ विषयस थःगु बिचाः प्वंकादीगु खः । संसद भंग यायेगु विषयस तत्कालीन केपी ओली नेतृत्वया सरकार विरुद्ध फैसला यायेबलय् छु छु हाथ्या वल धकाः छम्ह विद्यार्थीं न्यंगु न्ह्यसलय् वय्कलं प्रधानन्यायाधीश दयेकेमखु धाल तर वय्कलं थ्व खँ गबले व सुनां धाःगु खः धइगु खँ धाःसा सार्वजनिक मयानागु न्ह्यथनादिल । मदयेकूसा छु जुइ ? थः प्रधानन्यायाधीश जुइत न्यायाधीश मजुयागु न्याय बीत जुयागु कनादिल । थःम्ह संविधानलिसे सम्झौता मयायेगु व निर्भयता न्यायया नितिं तसकं महत्वपूर्ण तत्व जूगु तर्क बियादिल ।

अथे हे समाजय् जुइगु अपराध म्हो यायेत समाजया फुक्क पक्षयात जागृत यायेमाःगु वय्कलं धयादिल । बलात्कारया घटना अप्वया वनाच्वंगुलिं यौन शिक्षा आवश्यक जूगु वयेकःया धापु दु । कानूनी ज्ञान नं आवश्यक जुइ । हिंसायात सह यायेमज्यू, प्रमाणया संरक्षण यायेमाः, न्याय कायेमाःगु वयेकया तर्क दु । अथे हे न्यायाधीश मल्लं न्यायिक स्वायत्तता अतिकं महत्वपूर्ण जूगु धयादीगु दु ।