नेपाल समाजवादी पार्टी (नयाँ शक्ति) या नेतृत्व ल्ययेगु चुनावया नितिं थाैं सुथ १० ता इलय् मतगणना न्ह्याःगु दु । पार्टीया प्रवक्ता कृष्ण शर्माया कथं मंगलवाः बहनी लिबाक्क मतदान जूगु खः । वय्कलं बहनी मतदान क्वचाःगुलिं सुथय् १० ता ईनिसें मतगणना न्ह्याकेगु जानकारी नं बियादीगु खः ।

महाधिवेशनय् नेपाल समाजवादी पार्टीं ११ म्ह पदाधिकारी यानाः ९९ म्ह दुजः दुगु केन्द्रीय समितियात अन्तिम रुप बीगु निंतिं चुनाव याःगु खः । उकी मध्ये मिसा क्लस्टरपाखें मनुषी यमि भट्टराई व दलित क्लस्टरपाखें दुर्गा सोब निर्बिरोध उपाध्यक्षय् निर्वाचित जूइधुंकुगु दु । थ्व बाहेक १८ म्ह केन्द्रीय दुजःपिं नं निर्विरोध निर्वाचित जूगु दु । कोषाध्यक्षय् हरि रिजाल निर्विरोध निर्वाचित जूगु दु ।

सभापति, स्वम्ह उपाध्यक्ष, महासचिव, स्वम्ह सचिव, व केन्द्रीय दुजःया निर्णय निर्वाचनपाखें जुयाच्वंगु खः । सभापति पदय् बाबुराम भट्टराई व नेत्र चापागाईं, महासचिव पदय् घमानसिंह गुरुङ व सोनमसिंह स्याङ्तान उम्मेदवार दु । बहनी लिबाःगु हुनिं ८२२ म्ह प्रतिनिधिं जक मतदान याःगु प्रवक्ता शर्मां न्ह्यथनादीगु दु ।