काठमाडौं उपत्यका खानेपानी लिमिटेडं बबरमहल लागाय् च्वंगु चुहावट मर्मत याःगु दु । केयूकेएलया प्रमुख कार्यकारी अधिकृत (सीईओ) अशोककुमार पौडेलं बबरमहल लागाया स्यंगु पाइप हिलेधुंकाः आः लःया परीक्षण जुयाच्वंगु व थाैं बहनीनिसें आपूर्ति सुरु जुइगु दाबी यानादीगु दु । वय्कःया कथं बुधवाः बहनीनिसें पाइप मर्मतया ज्या न्ह्याकूगु खः ।

बुधवाः न्हिनय् २ः३० ता इलय् मेलम्चीया थोक वितरणया नितिं तयातःगु ५०० मिलिमिटरया पाइप तज्याना बबरमहल लागाय् खुसिबाः वःगु खः । वन विभाग, जिल्ला व विशेष अदालत परिसर तकं डुबे जूगु खः । बबरमहल क्षेत्रया छुँ स्थानीयया छेँ तकं डुबानय् लाःगु खः । काठमाडौं जिल्ला अदालतय् दुबान जुया सुनुवाइ तकं प्रभावित जूगु दु ।

विद्युत प्राधिकरणया लापरवाहीं ड्रिल यायेगु झ्वलय् बबरमहल लागाया पाइपय् प्वाः खंगुलिं खुसिबाः वःगु केयूकेएलं न्ह्यथंगु दु । प्राधिकरणं अन भूमिगत रुपं तार तयेगु निंतिं ड्रिल यानाच्वंगु दु । येँ महानगरं नं फुटपाथ दयेकाच्वंगु दु । निगुलिं निकायं सडक विभागपाखें अनुमति कयाः ज्या न्ह्याकूगु खः । सतक ड्रिल यायेगु झ्वलय् पाइप तज्याना आकाझाकां खुसिबाः वःगु केयूकेएलं धाःगु दु ।