सरकारं सामाजिक संजालया नामय् प्रेस व अभिव्यक्तिया स्वतन्त्रतायात कुण्ठित याइगु विधेयक हयेत्यंगु पलाःयात कयाः पत्रकार महासंघं विरोध याःगु दु । राष्ट्रियसभाय् दर्ता जूगु सामाजिक संजाल संचालन, प्रयोग व नियमन सम्बन्धी विधेयक महासंघ लगायत सरोकारवालातलिसे सहलह यानाः तत्काल लित कयाः पुनर्लेखन यायेत माग याःगु दु ।

काभ्रेया धुलिखेलय् सोमवाः व मंगलवाः च्वंगु महासंघया न्हापांगु कार्यबैठकं थ्व अवस्थाय् सरकारं विधेयक न्ह्यःने यंकल धाःसा विरोध प्रदर्शन यायेत बाध्य जुइगु ख्याच्वः ब्यूगु खः । महासचिव रामप्रसाद दाहालं बैठकं नागरिकया मौलिक हक हनन याइगु विधेयक न्ह्यःने यंकेगु पाय्छि मजूगु निर्णय याःगु न्ह्यथनादिल । महासंघया बैठकं बारम्बार सहलह लिपा संशोधनया छ्यातायात बेवास्ता यानाः राष्ट्रियसभां ‘मिडिया काउन्सिल विधेयक’ पारित याःगुलिं आपत्ति प्वंकुगु दु ।

श्रमजीवी पत्रकार ऐन इलय् हे संशोधन यानाः पूर्ण रुपं कार्यान्वयन यायेत सरकारयाके माग याःगु दु । थुकिं सरकारयात ज्या यानाच्वंपिं पत्रकारतय्गु न्यूनतम पारिश्रमिक व सेवाया सुविधा इलय् हे अप्वयेकेत, फुक्क संचार माध्यम व ज्या यानाच्वंपिं पत्रकारतय्त सामाजिक सुरक्षा कोषया दायराय् हयेत, ज्येष्ठ नागरिक पत्रकारिता कोषय् रकम अप्वयेकेत, ज्या यानाच्वंपिं पत्रकारतय्गु निःशुल्क दुर्घटना बीमायात स्वास्थ्य बीमाय् हिलेत व थुकियात कार्यान्वयन यायेत माग याःगु दु ।

महासंघं देय् न्यंकं छगू लिपा मेगु संचार माध्यम बन्द जुयाच्वंगुलिं सञ्चारमाध्यमय् ब्वलंगु संकट व बन्द जूगु कारणय् केन्द्रीत जुयाः सञ्चारमाध्यमया अवस्थाया अध्ययन यायेगु खँ धाःगु दु । महासंघं समावेशी व सुशासित संचार गृह दयेकेगु, आम संचार क्षेत्रय् मिसा, दलित, आदिवासी जनजाति, अपांगता दुपिं, मधेसी, सीमान्तकृत समुदाय, लिउने लाःगु क्षेत्रया प्रतिनिधित्व सुनिश्चित यायेमाःगु माग नं याःगु दु । लिसें महासंघं थःगु सदस्यता परिचयपत्रया आधारय् सिंहदरबारय् प्रवेशया व्यवस्था यायेत नं माग याःगु दु ।

बैठकं अध्यक्ष निर्मला शर्मां स्वदँया कार्यकालया नितिं पेश याःगु नीति प्रस्ताव, महासचिव रामप्रसाद दाहालं पेश याःगु संगठनात्मक प्रस्ताव, कोषाध्यक्ष रामकृष्ण अधिकारीं पेश याःगु आर्थिक प्रस्ताव पारित याःगु दु ।