जर्मन आर्किटेक्ट वोल्फगाङ कोर्नं च्वयादीगु गाइडेड बाइ गड्स, लस्ट इन लाइन्स नांया सफू येँ महानगरपालिकाया उपमेयर सुनिता डंगोल व नेपाःया नितिं जर्मन राजदूत डा. थोमस प्रिन्जं छगू समारोहया दथुइ विमाेचन याःगु दु । येँया सांस्कृतिक थाय् यत्खाय् जूगु उगु सफू पितब्वज्या ज्याझ्वलय् मूपाहां उपमेयर डंगोलं नेवाः सम्पदा संरक्षणय् च्वमि कोर्नं ज्वःमदुगु योगदान बियादीगु खँ कनादीगु खः । सम्पदाया नक्सांकण मदुगु इलय् नेवाः सम्पदाया नक्सा च्वयाः कोर्नं नेवाः सम्पदा संरक्षणय् तःधंगु तिबः बियादीगु खँ डंगोलं कनादिल । ल्याय्म्ह पुस्तां मखंगु नेपाःया छगू ईयात थुगु सफुतिं वर्णन यायेफइगु वय्कलं धयादिल । वय्कलं थःगु न्हापांगु विदेश यात्रा नं जर्मनी जूगु व अन पलाःपतिकं कल्चर सक वा अजु चाःगु धाःसें ५५ दँ न्ह्यः जर्मनीं नेपाः वःम्ह काेर्नया अनुभव ब्वनेत थः उत्सुक जूगु खँ कनादिल । डंगोलं नेपाः न्ह्याबलें काेर्नया याेगदान प्रति ऋणी जुइगु धयादिल ।

अथे हे विशेष पाहां कथं झाम्ह नेपाःया नितिं जर्मनीया राजदूत प्रिन्जं थुगु सफुतिइ छम्ह जर्मन नागरिकं नेपाःया नितिं याःगु योगदानयात उजागर याःगु जक मखु, नेपाः व जर्मनीया स्वापूयात नं उजागर याःगु धयादिल । राजदूत प्रिन्जं सम्पदा संरक्षण ताःहाकःगु यात्रा जूगु व थुकी जर्मनीं न्ह्याबलें साथ बीगु न्ह्यथनादिल ।

२०७२ सालया तःभुखाचं क्षति जूगु काष्ठमण्डपया पुनःनिर्माण यायेत काेर्नं ५० दँ न्ह्यः दयेकातःगु नक्सा छ्यःगु खः । अथे हे येँ, यल, ख्वपया दरवार व सम्पदा संरक्षणय् नं वय्कलं उल्लेखनीय योगदान बियादीगु दु । ‘बाखं न्याने वा’ संस्थाया प्रकाशनय् पितब्यूगु थुगु सफू वास्तुकलालिसे स्वापू मदुगु बरु नेपाःया छम्ह वास्तुकारया अनुभव जूगु जानकारी छ्याञ्जे रिजा जोशीं बियादीगु दु । अथे हे सफू प्रकाशनया कजि एलिना ताम्राकारं थुगु सफू च्वमिं च्वयादीगु डायरी, पौ, व लुमन्ति मुंकाः च्वयातःगुलिं च्वमिया व्यक्तिगत खँत नं पितबियागु न्ह्यथनादिल ।

च्वमि कोर्नं थःगु वास्तुकलाया अध्ययन क्वचायेकाः जर्मन सेनाय् भर्ना मजूसे विदेशय् स्वयंसेवा यायेगु ल्यःगु खः । उकि नेपाः छ्वयाहःगु इलय् नेपाः, येँ व सगरमाथा स्वंगू खँग्वः जक स्यूगु तर नेपाः थ्यनेधुंकाः थःत मेगु हे संसारय् दुहां वनागु अनुभव कनादिल । थुगु सफुतिइ वयेकलं हरेक पलाखय् सांस्कृतिक विविधताया प्रत्यक्ष अनुभव, नेपामितय्गु आत्मीयता, प्राकृतिक व सांस्कृतिक सौन्दर्यया लिसें जातीय भेडभाव, तःमि व चीमि दथुइ अन्तर भाेगेयानागु कथं च्वयागु न्ह्यथनादिल । कोर्न नेपाःया वास्तुकारतय् दथुइ नांजाःगु नां खः । कोर्नया ‘द ट्रेडिशनल आर्किटेक्चर अफ द काठमाडौं भ्याली’, ‘द स्टुपा एण्ड द चैत्य’, व ‘द शिखर’ लिसेंया सफूत उपलब्ध दु । वास्तुकला ब्वनीपिन्सं वय्कःया सफू ब्वनेमा ।

बाखं न्यने वाया नायः आश्विन वीर ताम्राकारं सुभाय् देछासें समारोह क्वचायेकूगु खः ।

फाेटाे : प्रविण कुमार महर्जन