राष्ट्रिय आर्टिफिसियल इन्टेलिजेन्स (एआई) नीति २०८१ यात अझ प्रभावकारी दयेकेत छगू विज्ञ संगठनं सरकारयात १० गु छ्याता धलः ब्यूगु दु । साइबर सुरक्षा अनुसन्धान व नवप्रवर्तन केन्द्र (सीएसआरआई नेपाल), सूचना सुरक्षा प्रतिक्रिया पुचः नेपाल (एनपीएसईआरटी), व इन्टरनेट शासन संस्थान (आईजीआई) मंकाः कथं १० गु धलःया छ्याता नापं अवधारणापत्र तयार यानाः संचार व सूचना प्रविधि मन्त्री पृथ्वी सुब्बा गुरुङयात लःल्हाःगु खः ।

अवधारणा पत्रय् नीति कार्यान्वयनयात प्रभावकारी यायेत प्राथमिकता बीमागु, म्याद क्वःछीमागु, जिम्मेवारी स्पष्ट यायेमागु, अनुगमन व मूल्यांकन संयन्त्रयात बल्लाकेमागु, क्षमता विकासय् ध्यान केन्द्रित यायेमागु, सहकार्ययात प्रवद्र्धन यायेमागु, नैतिकता व समावेशितायात उच्च प्राथमिकता बीमाःगु आवश्यकतायात बः बियातःगु दु ।

अवधारणा पत्र तयार यायेत सीएसआरआई नेपालया अध्यक्ष प्रा.डा. सुबर्ण शाक्य, आईजीआईया नायः अधिवक्ता बाबुराम अर्याल, सीएसआरआई नेपालया मूछ्याञ्जे व संचार तथा सूचना प्रविधि मन्त्रालयया आईटी विशेषज्ञ डा. शालिग्राम पराजुली, एनपीसेर्टया एआई सल्लाहकार डा. समीर खरेल, आइजीआईया निर्देशक रोशन पोखरेल, सिएसआरआइ नेपालया संस्थापक दुजः वन्दना शर्मा, लगायतया योगदान दु ।

मन्त्री गुरुङं सकसिगु सहभागिता व सुझावया आधारय् एआई नीतियात पारदर्शी रुपं न्ह्यःने यंकेगु न्ह्यथनादीगु दु । विज्ञतय् कथं एआईया छ्यलाबुला अप्वया वनाच्वंगु सन्दर्भय् सरकारं हःगु नीतियात लसकुस यायेबहःजूसां साइबर सुरक्षाया सम्भावित जोखिमयात ध्यानय् तयाः राष्ट्रिय सुरक्षाय् थुकिया महत्वपूर्ण भूमिका दुगुलिं एआईयात नीतिइ उचित रुपं दुथ्याकेमाःगु छ्याता ब्यूगु दु ।

सिएसआरआइ नेपालया नायः प्रा. डा. सुबर्ण शाक्यं राष्ट्रिय एआई नीति २०८१ नेपाःया नितिं महत्वपूर्ण अवसर जूगु धासें थुकियात प्रभावकारी यायेत सरोकारवालातय् दथुइ समन्वय आवश्यक जूगु धयादिल । वय्कलं नीति निर्माता, प्राविधिक विज्ञ, निजी क्षेत्र, शिक्षाविद्, नागरिक समाज दथुइ सहकार्य यानाः नीतियात प्रभावकारी यायेत बः बियादीगु दु ।