येँ महानगरं छात्रावास निर्धारित मापदण्ड कथं संचालन जुगु मजुगु अनुगमन व नियमन यायेत्यंगु दु । शिक्षा विभागं यानाच्वंगु ज्या व योजना बारे जानकारी कायेगु झ्वलय् उपमेयर सुनिता डंगोलं छात्रावास नियमन व व्यवस्थापन यायेगु खँ कनादिगु दु।

वय्कःया कथं छात्रावासयात व्यवस्थित, मर्यादित, सुरक्षित, पारदर्शी दयेकेगु व अन च्वनाच्वंपिं विद्यार्थी व प्रशासकतय्त अधिकतम लाभ जुइगु निंतिं जारी याःगु ‘छात्रावास संचालन मापदण्ड २०८०’ न्ह्यथनातःगु व्यवस्था कथं विभागं कार्यान्वयन यायेमाः । महानगर दुने छात्रावास संचालन यायेगु मापदण्ड कथं कार्ययोजना, प्रतिबद्धता नापंया निवेदन, वडापाखें सिफारिस, छात्रावास दुगु भवनया नक्सा, नक्सा पास प्रमाणपत्र, निर्माण क्वचाःगु प्रमाणपत्र, दर्ता प्रक्रियाया निंतिं दस्तावेज माःगु महानगरं धाःगु दु ।

महानगरया शिक्षा विभागं स्थलगत अनुगमन व अवस्थाया निरीक्षण लिपा जक संचालन अनुमति बी । महानगरया कथं होस्टेल दुनेया न्यूनतम पूर्वाधार शौचालय, भुतू, लःया आपूर्ति, मत, प्रत्येक ब्वनामिया निंतिं छगू खाता, दराज, व टेबुल, फोहर व्यवस्थापन व सरसफाइ, खुल्ला, माक्व जः व वायु प्रवाह जुइमाः ।

महानगरया डोरमेटरी नियमावलीया प्रावधान कथं :

मिँ स्यायेगु उपकरणलिसेंया सामग्री व उपकरण, मिं नयेगु थेंज्याःगु सम्भावित विपद् व्यवस्थापनया निंतिं प्राथमिक उपचारया सामग्री दयेमाः ।

अथे हे कोठा व शौचालय बाहेकया थासय् नं सीसी क्यामरा तयाः अनुगमन यायेमाः ।

ल्वापु जुइगु व प्रदूषण जुइगु सम्भावना दुगु थासय् डोरमेटरी तये मज्यू ।

मिजं व मिसा ब्वनामितय् निंतिं संचालन जुइगु भवन नापनापं जुइमज्यू । म्होतिं नं २०० मिटरया दुरी जुइमाः ।

सेवाया सुविधा, जिम्मेवारी व कर्तव्य, अनुशासन, गोपनीयता, आचारसंहिता सम्बन्धी आन्तरिक नियम दयेकेमा । अज्याःगु नियमावली महानगरय् पेश यानाः पारित यायेमालीगु जूगु दु ।

म्हसीका प्लेट बांलाक खनेदइगु व महानगरं क्वःछिनातःगु आकारया जुइमाः ।

ब्वनामिया नकतिनिया किपा व म्हसीका क्यनीगु सरकारी दस्तावेज तयेमाः ।

स्वापू मदुपिं मनूत दुकाये मज्यू ।

शैक्षिक वातावरण दयेकेमाः ।

अय्लाः, लागू वासः, सुर्तीजन्य पदार्थया ढुवानी, विक्री, वितरण व छ्यलाबुला याय् मदु ।

मापदण्डय् वार्डेन व ब्वनामिलिसें होस्टेललिसे स्वापू दुपिं मनूतय्गु कर्तव्य, अधिकार, अनुगमनया प्रावधान दुथ्याकातःगु दु ।

शुल्क, जरिवाना, विवाद समाधान लिसेंया विषयवस्तुयात न्यागू अध्यायय् व्यवस्था यानातःगु दु ।

निर्देशकं मांअबुया भूमिका म्हितेमाःगुलिं ३० दँ स्वयां अप्वः जुइमाः ।