प्रलिशा शाक्य न्हूम्ह मिस नेवाः ११४५ जुइत ताःलाःगु दु । “मिसा सशक्तिकरण धैगु थौंकन्हेया मिसापिंत शिक्षा, स्वास्थ्य, जागिर व अवसरय् समान पहुच जक मखु, मिसापिंत परम्परागत भुमिका, सामाजिक अपेक्षा व छथाय् जक सिमित मजुइगु संसार देकेगु खः । थ्व संसारय् मिसाया जाति, पृष्ठभुमि, हैसियत न्ह्यागुहे जूसां थःगु म्हगस पुवंकेगु व थःगु निर्णय थःम्हं यायेगु व थःगु सर्तय् जीवन हनेगु स्वतन्त्रता दइ । अथे जुल धाःसा छम्ह मिसा सशक्त जुइ ।” मू जज विद्यालक्ष्मी बज्राचार्यया सशक्त मिसाया अर्थ न्यंगु न्ह्यसलय् प्रलिशाया थूगु लिसलं वयेकःयात मिस नेवाः देकुगु खः ।
नेप्लिज फेसन होम व फाइट फोर नेपालया ग्वसालय् जूगु १८क्वःगु मिस नेवाः धेधेबल्ला कासाय् ल्यू लुनिभा मानन्धर व लियांल्यू लुमना महर्जन जुयादीगु दु । मिस नेवाः त्याकामियात नगद १ लख, अथेहे ल्यू यात २५ द्व व लियांल्यूयात १५ द्व तका लःल्हाःगु खः । धेधेबल्लाखय् २०म्ह मयेजुपिंसं ब्वति काःगु खः ।