प्रधानमन्त्री रोजगार ज्याझ्वया नितिं आवेदन चाःगु दु । श्रम, रोजगार तथा सामाजिक मामिला मन्त्रालयं वइगु आर्थिक दँ २०८२/८३ या नितिं प्रधानमन्त्री रोजगार ज्याझ्वपाखें न्यूनतम रोजगारीइ ब्वति कायेत ज्या मदुपिं नागरिकपिन्सं वइगु फागुन मसान्ततक आवेदन बीफइगु जानकारी ब्यूगु दु ।

प्रधानमन्त्री रोजगार ज्याझ्व कथं मंदुपिंसं सम्बन्धित वडा ज्याकुथिइ निवेदन तयेमा । १८ दँ निसें ५९ दँया नेपामिं न्यूनतम रोजगारीइ संलग्न जुयाः सामुदायिक विकासया ज्याय् योगदान यायेत आवेदन बीफइ । आवेदनलिसें नागरिकता प्रमाणपत्र, किपा, छुं नं सीपय् आधारित तालिमया प्रमाणपत्र, एकल हैसियत वा अपांगता प्रमाणित याइगु दस्तावेजया प्रतिलिपि अनिवार्य रुपं बुझे यायेमाः ।

सरकारं प्रधानमन्त्री रोजगार ज्याझ्वया नितिं स्थानीय तह पाखें खर्च यायेगु कथं बजेट विनियोजन यानाः वयाच्वंगु दु । सरकारं चालू आर्थिक दँया नितिं २ अर्ब विनियोजन याःगु दु । थुकिया स्रोत साधन नेपाल सरकारं हे कःघाइ । थुगुसी प्रधानमन्त्री रोजगार ज्याझ्वपाखें ८६ द्व मनूतय्त रोजगारी सिर्जना यायेगु लक्ष्य तयातःगु दु । स्थानीय तहलय् रोजगारीमुखी परियोजना न्ह्याकाः न्यूनतम रोजगारी बीगु निंतिं थ्व ज्याझ्वः ७५३ स्थानीय तहयात लःल्हाःगु दु।