येँया अनामनगरय् च्वंगु धोबीखुसी छगः गाडि कुतुं वंगुलिं प्रहरीं अस्थायी व्यवस्थापन याःगु दु । सिंहदरबार प्रहरी वृत्तं तेपं चिना खुसि सिथय् पंगु दु । सिंहदरबार वृत्तया प्रहरीया कथं दीर्घकालीन घेरा मदेकुतले थुकथं अस्थायी व्यवस्था याःगु खः ।

वंगु सोमवाः थुगु थासय् बा २१ च ६६१४ ल्याःया गाडि धोबीखुसी कुतुं वंगु खः । वसिबें न्ह्यः मंसिर ७ गते बीए ८७१४ नम्बरया गाडि धोबीखुसी कुतुंवंगु खः ।

खुसि सिथय् पःखा वा चिं मदुगुलिं गाडित खुसिइ कुतुवंगु प्रहरीया धापु दु । थःपिंके ध्यबा मदुगुलिं थःपिंके दूगु टेप व बहनी खनेदइगु स्टिकर तिका खुसि दूगु खतरा क्यनेत्यंगु खः ।

दीर्घकालीन घेरा दयेकेगु निंतिं टेण्डर प्रक्रिया जुयाच्वंगु दु। भौतिक निर्माणय् लापरवाही जूगुलिं थुकथं गाडि खुसिइ कुतुवनाच्वंगु खः । आः तेप तिका गाडि पने मफुसां चालकयात बहनी वने मज्यू धका सुचं धाःसा बी ।