सरकारलिसे न्यागू धलःया सहमति लिपा चिकित्सक संघं विरोधया ज्याझ्वःत स्थगित याःगु दु । स्वास्थ्यमन्त्री, महाशाखा प्रमुख, व संघया अधिकारी दथुइ शुक्रवाः न्हिनय् स्वास्थ्य मन्त्रालयय् जूगु सहलहलय् स्वास्थ्यकर्मीतय्सं ल्ह्वंगु मागयात सम्बोधन यायेगु निंतिं सहमति जूगु खः ।

बुधबाः व बिहिबाः देय्न्यंकंया स्वास्थ्य संस्थाय् ज्या यानाच्वंपिं चिकित्सक व स्वास्थ्यकःमितय्सं ज्याकुथिया न्हापांगु घाै थःथःगु संस्था न्ह्यःने हाकुगु ब्याण्ड चिना धर्ना बिरोध प्रदर्शन याःगु खः । सरकारं थुकियात सम्बोधन मयात धाःसा आकस्मिक सेवा बाहेकया फुक्क सेवा बन्द यायेगु ख्याच्वः नं संघं ब्यूगु खः ।

संघं सरकारयात ४८ घाैया अल्टिमेटम बिसें थीथी न्यागू माग न्ह्यःने तःगु खः । धलः १ व २ या माग सरकारं पूवंकूगु तर मेमेगु विषयस रुचि मक्यंगु धासें संघं विरोध ज्याझ्वः सार्वजनिक याःगु खः । शुक्रवाःया सहलहया झ्वलय् चिकित्सक व स्वास्थ्यकर्मीया संगठन व व्यवस्थापन सर्वेक्षण स्वला दुने क्वचायेकाः मन्त्रिपरिषदया बैठकय् पेश यायेगु निर्णय याःगु दु । थुकिया नितिं स्वास्थ्य मन्त्रालयपाखें प्रवक्ता डा. प्रशासन उपसचिव व संघया प्रतिनिधिलिसें प्रकाश बुढाथोकीया नेतृत्वय् स्वम्ह दुजःया कार्यदलं छवाःया दुने कार्यविधि तयार यानाः बुझे यायेगु निर्णय जूगु दु ।

अथे हे नेपाल सरकारया प्रचलित नियमावली कथं ड्युटीया ई, ज्याया वातावरण व सेवाया सुविधा, बिदा, व इन्टर्नसिप व रेसिडेन्ट चिकित्सकया निंतिं स्वस्थ कार्यस्थल सुनिश्चित यायेत माःगु व्यवस्था यायेत चिकित्सा शिक्षा आयोग लगायतया निकाययात पत्राचार यायेगु निर्णय नं याःगु दु । अस्पताल व स्वास्थ्य संस्थाय् ज्या यानाच्वंपिं फुक्क चिकित्सकयात शतप्रतिशत जोखिम भत्ता बीगु निंतिं स्वला दुने आवश्यक कानून दयेकेगु, चिकित्सा सेवा आयोग गठन लिसेंया प्रस्तावित चिकित्सक ऐन स्वीकृतिया निंतिं स्वला दुने पेश यायेगु निर्णय जूगु दु ।