बागमती प्रदेश युवा परिषदं स्वीकृत वार्षिक ज्याझ्वः कथं ३०५ म्ह युवाया नितिं थीथी सीप आधारित तालिम न्ह्याकूगु दु । बागमती प्रदेश युवा तथा खेलकुद मन्त्री मिनकृष्ण महर्जनं उगु तालिमया औपचारिक उलेज्या शुक्रबाः यानादीगु खः । प्रदेश युवा परिषदया कार्यकारी न्वकु सन्तोष चौलागाईंया सभापतित्वय् जूगु उगु ज्याझ्वलय् मूपाहाँ मन्त्री महर्जनं युवातय्त सीप बियाः गां व समाजया माध्यमं देय्या आर्थिक रुपान्तरणय् योगदान बी फइगु खँ कनादिल। वय्कलं थुज्वःगु तालिमं नेपाःया युवापिन्त रोजगारीया अवसर सिर्जना यायेत ग्वाहालि जुइगु जूगुलिं प्रादेशिक सरकारपाखें निरन्तर ग्वाहालि जुइगु प्रतिबद्धता प्वंकादिल । तालिमय् कुक, वेटर, बरिस्ता, मोन्टेसरी, ब्यूटी पार्लर, बिल्डिङ इलेक्ट्रिसियन थेंज्याःगु विषय दुथ्याकातःगु दु ।

पूर्वमन्त्री नापं प्रदेशसभा सदस्य एकलाल श्रेष्ठ, हेटौंडा उपमहनगर–४ सभापति नविन सिग्देल, नेपाल पत्रकार महासंघ बागमती प्रदेश सभापति कृष्ण सारु मगर, मकवानपुर उद्योग वाणिज्य संघ उपसभापति उज्जल चौलागैं, मकवानपुर पत्रकार महासंघया नायः बालकृष्ण अधिकारी, गैसस महासंघ मकवानपुरया नायः रमिला सापकोटा, परिषदया सदस्य सुरज थापा मगर (किरण), ज्याकु प्रमुख रमेश घिमिरे नापंया उपस्थिति दूगु खः।