नेसं ११४५ चिल्लाथ्व १२, येँ । हाेली पर्व न्ह्यःने वयाच्वंगु इलय् जिल्ला प्रशासन ज्याकुथिं होली नखःया नामय् तडकभडक ज्या मयाेत सचेत याःगु दु । चीर स्वायेगु नापं हाेली न्ह्याःगु जूसा थुगुसि वैगु फागुन २९ गते हाेली लाःगु दुसा तराइ भेगय् चैत १ गते हाेली न्यायेकि । थुकिया नितिं प्रशासनं सुनां नं थःगु इच्छा विपरीत रंग तयेगु, लखं लुइगु वा लः दूगु बेलुन वा झाेलां मकेकेत इनाप याःगु दु ।

जिल्ला प्रशासन ज्याकु येँया प्रवक्ता व सहायक प्रमुख जिल्ला अधिकारी अनिल पौडेलं छगू प्रेस विज्ञप्ति जारी यासें सामाजिक सद्भाव व भातृत्व कायम यानाः होली न्यायेकेत इनाप यानादीगु दु । हाेली धार्मिक, सामाजिक व सांस्कृतिक नखः कथं हनेत व खर्च अप्व यायेगु वा तडकभडक जुइकथं महनेत तकं इनाप याःगु दु ।
अथेहे सार्वजनिक थासय् हल्ला यायेगु वा ल्वापु यायेगु, मादक पदार्थ सेवन यायेगु वा पारिवारिक व सामाजिक जीवनयात व्यवधानय् लाकेगु वा सार्वजनिक मर्यादा व शान्तियात स्यंकेगु, अत्यधिक उत्तेजनाय् चाःहिलाः दुर्घटनाय् नापं मृत्यु तकं जुइफूगुलिं अमर्यादित ज्या मयायेत इनाप तकं याःगु दु ।
थःगु अधिकारया प्रयोग यायेगु झ्वलय् मेपिनिगु अधिकार हनन मजुइमा धकाः सांस्कृतिक पर्वयात मर्यादित, अनुशासित, व संगठित रुपं हनेत प्रशासनं इनाप याःगु दु । इनाप कथं मयाःसा वा गैरकानूनी ज्या याःसा प्रचलित कानून कथं कारवाही यायेगु ख्याच्व तकं प्रशासनं ब्यूगु दु ।