नेसं ११४५ चिल्लाथ्व १३, येँ । ५५० दँ न्ह्यः दयेकुगु स्वंगु पौभा नेपालय् लिहाँ हःगु लसताय् हना ज्याझ्वः जूगु दु । उगु पौभा ४५ दँ न्ह्यः इतुम्बहालं खुया यंकुगु खः । ज्याझ्वलय् मू पाहाँ कथं झाम्ह येँ महानगरपालिका उपमेयर सुनिता डंगोलं नेपाःया सम्पदा लित वःगु तसकं लसताया खँ जूगु न्ह्यथनादिल । वयेकलं लित हःपिंत सुभाय् देछासें लित हये धुंका अझ अप्व ज्या ल्यं दूगु न्ह्यथनादिल । संरक्षण यानातयेत माःगु कथंया व्यवस्था यायेत इतुम्बहाल म्यूजियमयात महानगरं १ करोडया बजेत फ्यानातयागु न्ह्यथनादिल ।

श्री केशचन्द्र महाविहार संरक्षण समाजया ग्वसालय् जूगु हना ज्याझ्वलय् श्री भाष्करदेव संस्कारित केशचन्द्रकृत पारायत महाविहारया पौभा हयेत पहल यानादीम्ह नेवाः गुथि अमेरिकाया नायः बिजयमान सिंहयात सुभाय् देछासें हंगु खः । अमेरिकाया सँग्रहालय नापं व्यक्तिगत सँग्रहलय् लानाच्वंगु नेपालं खुयायंकुगु थीथी सम्पदा लित हयेत माःकथं पहल यायेत भुमिका म्हितागु न्ह्यथनादिल । थःगु पहलय् २० गु स्वयाँ अप्व सम्पदा नेपाः लित हयेफूगुलिं वयेकलं गर्व जूगु न्ह्यथनादिल । नेपाःया सम्पदा लिच्छबि व मल्ल कालिन जूगु तर शाह जुजुपिनि पालय् हे यक्व सम्पदा खुया यंकुगु वयेकलं न्ह्यथनादिल ।
लित वःगु पौभा नापं मेगु सम्पदा थौं हे त्रिभुवन एयरपोर्टया भन्सारय् थ्यनेधुंकुगु व अनं भन्सार पुला पुरातत्व विभागय् यंकेत्यंगु दु । अनं अनुसन्धान याना पुरातत्व विभागं पत्रकार सम्मेलन याना स्वंगु पौभा इतुम्बहाल म्यूजियमय् लःल्हाइगु व मेगु सम्पदा गनयागु खः अन लित बीगु जूगु दु ।

हना ज्याझ्वलय् सभानायः महाविहारया मू थाय्पा मनिरत्न शाक्य जुयादीगु खःसा संरक्षण समाजया नायः प्रज्ञारत्न शाक्य, वल्र्ड नेवाः अर्गनाइजेशन नेपाः च्याप्टरया नायः सुरेन्द्रभक्त श्रेष्ठ, नेवाः पत्रकार राष्ट्यि दबुया सहसचिव प्रजित शाक्य अथेहे सम्पदा संरक्षण महाअभियानया नायः सुनिल प्रजापति पाहाँ कथं झायादीगु खः ।

लितहःगु स्वपा पाैभाः व मेमेगु सम्पदाया धलः क्वय् दु ।