नेसं ११४५ चाैलाथ्व फागुपुन्हि, येँ । होलि क्वचाल तर हाेलीया नितिं रंग गनं वल सुनां स्यूला ? नेपाः जक अज्याःगु दे जुइ गन निन्हु हाेली न्यायेकी । पहाडी लागाय् बिहिबाः हाेली क्वचालसा तराइ लागाय् शुक्रबाः ।

सरकारी तथ्यांक कथं चालु आर्थिक दँ २०८१/८२ या ७ ला दुने भारत व चीनं जक १५ करोड ८९ लख ६० द्व बराबरया रङ्ग नेपाः दुहाँ वःगु दु । थ्व १३ लख ३९ द्व ५३ किलो बराबर खः । आयातित रंग अप्वः धइथें होलिया नितिं वःगु खः । व बाहेक माेहनी, स्वन्ति आदि नखःचखःबलय् नं थुकिया खपत जुइ ।

अथे हे अष्ट्रेलिया, संयुक्त अरब इमिरेट्स (युएई), फ्रान्स, मेक्सिको, जर्मनी लगायतया देसं नं नेपालय् रङ्ग न्याना हयेगु याइ ।