नेसं ११४५ चाैलाथ्व फागुपुन्हि, पाल्पा। उपप्रधानमन्त्री नापं सहरी विकासमन्त्री प्रकाशमान सिंहं पुलांपिं राष्ट्रपति व पुलांपिं प्रधानमन्त्री लगायत पुलांपिं गण्यमान्य व्यक्तिपिन्त विशेष सेवा व सुविधा बीगु धकाः जुयाच्वंगु प्रचार गलत जूगु धयादीगु दु । आःया सरकारं पुलांपिंत थप सेवा व सुविधा बीत गृहकार्य मयाःगु वय्कःया दावी दु । वय्कलं थज्यागु हल्लाया लिउलिउ मवनेत नं इनाप यानादिल ।

शुक्रवाः नेपाली कांग्रेस पाल्पा जिल्ला कार्यसमितिं याःगु सहलहलय् थ्व खँ धयादीगु खः । २०६९ सालय् तत्कालीन प्रधानमन्त्री बाबुराम भट्टराईया नेतृत्वय् सरकारं पुलांपिं विशिष्टपिंत सुविधा बीगु अध्यादेश हःगु खः । अज्याःगु हे सुविधा हयेत सरकार न्ह्याः वनाच्वंगु खँया उपप्रधानमन्त्री सिंहं खण्डन यानादीगु खः ।