अमेरिकी राष्ट्रपति डोनाल्ड ट्रम्पं नेदरल्याण्ड्सया हेगय् च्वंगु अन्तर्राष्ट्रिय फौजदारी अदालतयात प्रतिबन्ध तयेगु कार्यकारी आदेशय् हस्ताक्षर याःगु दु । इजरायलया प्रधानमन्त्री बेन्जामिन नेतान्याहु वाशिंगटन भ्रमणय् वनाच्वंगु इलय् ट्रम्पं अदालतयात प्रतिबन्ध तयेगु निर्णय याःगु बीबीसीं न्ह्यथंगु दु ।

सन् २०२१ या नोभेम्बरय् अन्तर्राष्ट्रिय न्यायालयं इजरायलया प्रधानमन्त्री नेतान्याहु व पूर्व रक्षामन्त्री योआभ ग्यालान्टयात गाजा पट्टीइ बर्बर आक्रमण यानाः युद्ध अपराध याःगु द्वपनय् गिरफ्तारी वारेन्ट जारी याःगु खः । तर अमेरिका व इजरायल निगुलिं अन्तर्राष्ट्रिय फौजदारी अदालतया दुजः धाःसा मखु । निगुलिं देसं थ्व अदालतयात मान्यता तकं मब्यूनि । रुस व चीन नं थ्व अदालतय् दुजः मखु । नेदरल्याण्ड्सया हेगय् च्वंगु अन्तर्राष्ट्रिय फौजदारी अदालतय् १२४ गू दुजः देय् दु । थ्व २००२ स पलिस्था जूगु खः ।