वैज्ञानिकतय्सं छगू उल्कापिंड पृथ्वीयात तःधंगु खतरा जुयाच्वंगु धाःगु दु । वैज्ञानिकतय्सं दकलय् शक्तिशाली दूरबीनं थ्व खंगु खः । २०२४ वाईआर ४ नां बियातःगु उल्कापिंड छगू भवनया आकारय् दु । थ्व प्रतिघाै ६१ द्व किलोमिटरया गतिं न्ह्यानाच्वंगु दु ।

थ्व नासाया एस्टेरोइड टेरेस्ट्रियल-इम्प्याक्ट लास्ट अलर्ट सिस्टम (एटीएलएएस) पाखें सन् २०२४ स लुइकूगु खः । नासां अनुगमन याःगु उल्कापिंडया धलखय् थ्व दकलय् च्वय् लाः । डिसेम्बर २०३२ य् उल्कापिंड पृथ्वी कुतुवैगु सम्भावना करिब २ प्रतिशत दु । आःया अनुमान कथं थुकिं पृथ्वी कुतुवैगु सम्भावना ४३ मध्ये छगू दु ।

युरोपेली अन्तरिक्ष एजेन्सी (इएसए) या छगू ब्लग पोष्ट कथं खगोलविद्तय्गु छगू अन्तर्राष्ट्रिय पुचःयात थुकिया अध्ययन यायेत जेम्स वेब अन्तरिक्ष दूरबीनया आपतकालीन प्रयोगया अनुमति ब्यूगु दु । थ्व उल्कापिंड ४० निसें ९० मिटर ब्या दु । थुकिया ब्यास अथे हे ५५ मिटर दु । थ्व पिसाया लिनिङ्ग टावरया जाः बराबर खः ।

सन् १९०८ य् कुतुं वःगु छगु उल्कापिंडं साइबेरियाया जंगलय् थ्यंमथ्यं ८ करोड सिमा क्वथःगु खः । थूगु उल्कापिंड नं अथेहे विनाशकारी जुइफूगु अनुमान वैज्ञानिकतयेसं याःगु दु ।