इजरायली सेनां हाकनं गाजा पट्टीइ आक्रमण याःगु दु । गाजाया राफाह लागाय् याःगु आक्रमणय् लानाः निम्ह प्यालेस्टाइनी सीगु दु ।

अन्तर्राष्ट्रिय संचार माध्यमया कथं संयुक्त राष्ट्र संघं संचालन यानाच्वंगु स्वंगू स्कूलया लिसें व्यावसायिक तालिम केन्द्रय् नं आक्रमण जूगु दु । निक्वःगु युद्धविरामया तयारी जूसां नं इजरायलं थःगु आक्रमणयात निरन्तरता बियाच्वंगु दु ।

इजरायलया विदेशमन्त्री गिडियन सारं गाजा युद्धविराम सम्झौताया निगूगु चरणया वार्ता थुगु वालय् जुइगु जानकारी ब्यूगु दु । हमासं बिहिबाः प्यम्ह बन्धकया सीम्ह व शनिवाः ६ म्ह जीवित बन्धक त्वःतेगु सहमति याःगु दु ।

गाजा स्वास्थ्य मन्त्रालयया कथं इजरायलं गाजाय् याःगु आक्रमणय् आःतक ४८ द्व २९१ म्ह प्यालेस्टाइनी सीधुंकूगु दु । छगु लख ११ द्व ७२२ घाःपाः जूगु दु ।