सरकारं न्ह्याकाच्वंगु गर्भाशयया क्यान्सर विरुद्धया एचपीभी खोप अभियानय् थ्यंमथ्यं ४० प्रतिशत मिसामस्तय्त खोप बिउगु दु । स्वास्थ्य सेवा विभागया बाल स्वास्थ्य व खोप शाखा प्रमुख डा. अभियान गौतमया कथं खोप अभियानया स्वंगूगु दिं माघ २४ गते तक ३९.४६ प्रतिशत मिसामस्तय्त खोप ब्यूगु दु । थ्व कथं १६ लाख ८८ हजार किशोरी, ७६८ प्रतिशत मिसामस्तय्सं खोप कायेधुंकुगु दु ।

गौतमया कथं कोशीइ ३८.७ प्रतिशत, मधेशय् १९.९ प्रतिशत, बागमतीइ ४१.६ प्रतिशत, गण्डकीइ ४५.२ प्रतिशत, लुम्बिनीइ ४९.७ प्रतिशत, कर्णालीइ ३७.७ प्रतिशत व सुदुरपश्चिमय् ३९.५ प्रतिशत मिसामस्तय्त खोप ब्यूगु दु । अछाम जिल्लाय् दकलय् अप्वः मिसामस्तय्त खोप ब्यूगु दु, गुकी ८९.३ प्रतिशत मिसामस्तय्त खोप ब्यूगु दु । अथे हे बैतडीया ८२.७ प्रतिशत व गोरखाया ७७.८ प्रतिशत मिसा मस्तय्त खोप ब्यूगु दु ।