दिल्ली विधानसभा निर्वाचनय् भारतीय जनता पार्टीं बहुमत काःगु दु । बुधवाः क्वचाःगु निर्वाचनया मतगणना शनिवाः सुथंनिसें न्ह्याःगु खः ।

भारतीय सञ्चारमाध्यमतसें न्हिनय् तकया लिच्वः वयेवं थुगुसी दिल्लीइ भाजपां बहुमत काइगु पुष्टि याःगु बुखँ पिथंगु दु । थौं न्हिनय् तकया निर्वाचनया लिच्वः कथं भाजपाया उम्मेदवारत ७० मध्ये ८ सिट त्याःगु दुसा ४१ सिटय् न्ह्यःने लानाच्वंगु दु । अथे हे आम आदमी पार्टीया उम्मेदवारत ८ गू थासय् त्यानाच्वंगु दुसा १३ गू थासय् अग्रता कयाच्वंगु दु । कांग्रेसं छुं नं सिटय् त्याकूगु मदुनि ।

दिल्लीया पूर्व मुख्यमन्त्री अरविन्द केजरीवाल थुगुसि पराजित जूगु दु । न्हू दिल्लीया सिटय् केजरीवालयात भाजपाया प्रवेश शाहिब सिंह वर्मां पराजित याःगु खः । वय्कलं ३० हजार २४ मत काःगु दु । व धइगु कुल मतया ४८.८५ प्रतिशत खः । केजरीवालं २५ हजार ९२५ मत हःगु खः । थ्व ४२.१८ प्रतिशत खः । कांग्रेसया सन्दीप दीक्षितं ४५४१ मत हःगु खः । वय्कलं ७.३९ प्रतिशत मत हयादीगु खः ।

थ्वसिबें न्ह्यः सन् २०२० य् अरविन्द केजरीवालं ४६ हजार ७५८ मत हःगु खःसा सन् २०१५ य् ५७ हजार २१३ मत हयाः त्याःगु खः । सन् २०१५ व २०२० स दिल्लीइ आम आदमी पार्टीं बहुमत त्याकूगु खः । आम आदमी पार्टीं सन् २०१५ य् ७० मध्ये ६७ व २०२० य् ७० मध्ये ६२ सिट त्याकूगु खः । मदिरा विक्री नीतिइ भ्रष्टाचार याःगु द्वपनय् केजरीवालयात चैत ७ गते गिरफ्तार याःगु खः ।