हिमाली जिल्ला हुम्लाय् वइगु फाल्गुन १८ निसें गर्भाशयया क्यान्सर विरुद्धया एचपीभी भ्याक्सिन बीगु जूगु दु । स्कूल वनिपिं मिसा मचातय्त लक्षित यानाः खोप बीत्यंगु खःसां थौंकन्हय् जिल्लान्यंकंया स्कूल बन्द जूगुलिं देय्न्यंकं खोप सुरु यायेगु धाःसां नं हुम्लाय् थ्व खोप स्थगित जूगु दु ।

प्रमुख प्रतिक्षा भारतीं हुम्ला जिल्लाय् फाल्गुन १८ निसें खोप अभियान न्ह्याकेगु जानकारी ब्यूगु दु । वय्कलं थौंकन्हय् चिकुलाया बिदाया हुनिं जिल्लाया फुक्क ब्वनेकुथि बन्द जूगु जानकारी बियादीगु दु । फाल्गुन २ गतेनिसें स्कूल सुरु जूसां नं १५ गते लिपा जक स्कूलं ब्वंकेगु तयारी याःगु दु ।

थ्व खोप १० निसें १४ दँ दुपिं मिसा मस्तय्त बिइगु ज्या जुयाच्वंगु दु । ३४४३ म्ह किशोरी मिसामस्तय्त लक्षित यानाः खोप अभियान न्ह्याकाच्वंगु दु । ब्वनेकुथिइ वनीपिं व ब्वनेकुथिं पिनेयापिंत थुगु खोप बीगु जुइ । ज्याकुथि प्रमुख भारतीया कथं जिल्लाया ७ गू गाउँपालिकाया ९९ गू खोप केन्द्रपाखें खोप अभियान संचालन जुइ । थुगु खोप अभियान जिल्लाया खुगू गाउँपालिकाय् फाल्गुन १८ निसें २९ तक न्ह्याकेगु ज्याझ्वः दु ।

उत्तरी नाम्खा गाउँपालिकाया हिमालय पारीया लिमि, यरी लगायतया गामय् च्वापुया हुनिं वनेगु लँपु बन्द जुइगु जूगुलिं २०८२ साल फाल्गुन २० गतेनिसें बैशाख ७ गते तक खोप अभियान न्ह्याकेगु वय्कलं धयादीगु दु ।

स्वास्थ्य सेवा ज्याकुथिं जिल्लाया उत्तरी नाम्खा गाउँपालिकाया १७ गुलिं खोप केन्द्रय् ३१९ मिसामस्त, सिमकोट गाउँपालिकाया २० गु खोप केन्द्रं ७५६, खार्पुनाथ गाउँपालिकाया १५ गु खोप केन्द्रं ३६५, सर्केगाडय् १८ खोप केन्द्रं ६८६, चंखेलीइ ३६५ म्ह, अदनचुलीया १० गू खोप केन्द्रपाखें ६०७ म्ह व ताञ्जकोट गाउँपालिकाया १२ गू खोप केन्द्रपाखें ३७८ म्ह मिसामचातय्त गर्भाशयया क्यान्सर विरुद्ध एचपिभी खाेप बीत्यंगु दु ।

स्कूलय् हे ६ निसें १० तगिंया स्कूल वनीपिं मिसा मस्तय्त खोप बीगु तयारी जुयाच्वंगु दु । खोप केन्द्रय् ९९ म्ह स्वास्थ्यकःमि व १९८ म्ह स्वयंसेवक परिचालन याइगु जूगु दु । जिल्लाया फुक्क स्थानीय तहलिसे समन्वय यानाः उगु ज्याझ्वः कार्यान्वयन याइगु जूगु दु । थुगु अभियानं गर्भाशयया क्यान्सरया जोखिम म्ह्वः यायेत तःधंगु योगदान बीगु आशा यानातःगु दु ।