नेपालं सूचना प्रविधि (आइटी)या जनशक्ति उत्पादन यात धाःसा दँय् दसं १ खर्ब स्वयां अप्वः आम्दानी यायेफइगु खँ विज्ञतय्सं धाःगु दु। नेपाली कांग्रेसया उद्यमशीलता तथा साना मध्यम उद्यम विकास विभागं ग्वसाः ग्वःगु सम्मेलनय् इमिसं थ्व बिचाः प्वंकूगु खः । नेपाली कांग्रेस केन्द्रीय पार्टीया ज्याकुथि सानेपाय् जूगु नेपाल ‘स्टार्टअप’ व ‘एसएमई’ सम्मेलनया निन्हुया दिं ‘उद्यमशीलता व मानव संसाधन विकास : आईटी क्षेत्रया तयारी’ शीर्षकय् जूगु सहलह ज्याझ्वलय् वक्तापिन्सं आईटीइ भचा भचा लगानी यानाः बांलाःगु लिच्वः कायेफइगु खँ धाःगु दु ।

इनोभेटिभ नेपाल (आईएनजी) ग्रुपया प्रमुख सुलभ बुढाथोकीं नेपाःया आईटी क्षेत्रय् आपालं ह्वःताः दुगुलिं दक्ष मानव संसाधन निर्माणया निंतिं लगानी आवश्यक जूगु खँ धयादीगु दु। वय्कलं आवश्यकता कथं जनशक्ति उत्पादन याये फत धाःसा दँय् छगू खर्बसिबें अप्वः बराबरया आईटी सेवा निर्यात यायेफइगु धयादिल ।

ज्याझ्वलय् त्रिभुवन विश्वविद्यालयया डिन प्रा.महानानन्द चालिसें वर्तमान युगय् राज्य प्राविधिक शिक्षा लगायत व्यावसायिक ज्ञानय् केन्द्रित जुइमाःगु धयादिल । वय्कलं शिक्षाया प्राविधिक पक्षय् सरकारं ध्यान बिइमाःगु खँ न्ह्यथनादिल । थुकिया नितिं त्रिभुवन विश्वविद्यालयं थःगु पाखें निरन्तर रुपं ज्या यानाच्वंगु जानकारी नं ब्यूगु दु ।

सिनासया कार्यकारी निर्देशक मिर्गेन्द्र कार्कीं हिलाच्वंगु ई कथं म्हगसय् खनेगु, लगानी यायेगु, छ्यलेगु क्षेत्रयात अलग अलग यानाः ब्रान्डिङपाखें प्रवर्द्धन यायेमाःगु आवश्यक जूगु धयादीगु दु । राज्यं देय्या भूगोल कथं उत्पादित उत्पादनया प्रवद्र्धन याये फत धाःसा समग्र आर्थिक रुपान्तरण यायेत अःपुइगु खँ नं उल्लेख यानादिल।

यंग इनोभेसनया संस्थापक विभूषण विष्टं यदि राज्यं आईटी क्षेत्रयात दुथ्याकेगु नीति हल धाःसा थौंकन्हय् स्वयां प्यदुगं अप्वः जनशक्ति उत्पादन यायेफइगु व उकथं हे सेवा निर्यात यायेफइगु खँ धयादीगु दु ।

अथे हे खिम्भु टेकया सीईओ कर्विका थापां स्टार्टअप सुरु यायेबलय् थःत यःगु विषय ल्ययाः उकी हे ज्या याःसा जक सफलता प्राप्त जुइगु धयादिल ।

नेपाली कांग्रेसया केन्द्रीय ज्याकुथिइ बुधवाःनिसें न्ह्याःगु उगु सम्मेलनं नकतिनि व्यवसाय सुरु याःपिं उद्यमी व व्यवसायीपिन्त प्रोत्साहन बिइगु व व्यवसाय प्रवद्र्धन नं जुइगु विभागया संयोजक उर्मिला थपलियाया विश्वास दु ।