चिकित्सा शिक्षा आयोगया १६ क्वःगु बैठकं निजी चिकित्सा कलेजय् ब्वनाच्वंपिं आवासीय चिकित्सकपिन्त सरकारी बराबरया निर्वाह भत्ता (च्यागूगु तह) बीगु निर्णय याःगु दु । प्रधानमन्त्री व आयोगया नायः केपी शर्मा ओलीया अध्यक्षताय् शुक्रवाः प्रधानमन्त्री व मन्त्रिपरिषदया ज्याकुथिइ च्वंगु बैठकं सम्बन्धित पक्षलिसे जूगु सहलह व प्राप्त प्रतिवेदनया आधारय् आवासीय चिकित्सकया नितिं सुविधा कायम यायेगु निर्णय याःगु खः ।

प्रधानमन्त्री ओलीया सचिवालयं मेमेगु विषयस थप सहलह लिपा आयोगया बैठकय् याकनं हे निर्णय यायेगु निष्कर्ष पिकाःगु जानकारी ब्यूगु दु । बैठकय् सम्बन्धित कलेजलिसे निदँया अध्ययन व कार्य सम्झौता यायेत अस्वीकार याइपिं ब्वनामिपाखें मुक्कं २३ लाख शुल्क कायेगु विषयस नं सहलह जूगु खः ।

थौंकन्हय् निजी मेडिकल कलेजं मासिक २० हजार तका निर्वाह भत्ता बियाच्वंगु दु । समान सुविधाया नितिं स्नातकोत्तर विद्यार्थीपिन्सं आन्दोलन यानाच्वंगु व आयोगया परीक्षाय् नं लिच्वः लानाच्वंगु अवस्थाया समाधान मालेगु नितिं थुज्वःगु पहल याःगु खः ।

बैठकय् प्राइभेट मेडिकल कलेज एसोसिएसनया नायः प्राध्यापक डा. ज्ञानेन्द्र मानसिंह कार्कीं कार्यविधि क्वचाये धुंकाः निर्णय यायेत इनाप यानादीगु खः । प्रधानमन्त्री ओली, स्वास्थ्य तथा जनसंख्या मन्त्री प्रदीप पौडेल, शिक्षा, विज्ञान तथा प्रविधिमन्त्री विद्या भट्टराईं आवासीय चिकित्सकपिन्त समान सुविधा बीगु प्रतिवद्धतापाखें थःपिं लिचिले मफइगु खँ धयादीगु खः ।

एकीकृत नियमन, अनुगमन, प्रवेश परीक्षा संचालन, शैक्षिक संस्थाय् विद्यार्थी सिटया ल्याः निर्धारण, ट्युसन शुल्क निर्धारण सम्बन्धी ज्या याना वयाच्वंगु आयोगया बैठकय् राष्ट्रिय चिकित्सा शिक्षा ऐन, २०७५ य् आवश्यक संशोधन न्ह्याकेगु प्रक्रियायात कयाः नं सहलह जूगु खः ।