पशुपतिनाथ देगःया प्यंगू हे ध्वाखा हरितालिका तीजया दिं थाैं सुथय् ३ बजे निसें चालीगु जूगु दु । तीजया दिं पूजा व दर्शनया विशेष व्यवस्था नं याःगु पशुपति क्षेत्र विकास समितिपाखें जानकारी ब्यूगु दु । देगः दर्शन याइपिन्त देगः पिने न्यागु लाइन व देगः परिसरय् दुहां वयेधुंकाः झिगू लाइन दइगु व्यवस्था यानातःगु दु ।

भण्डारखाल पार्किङ, सिफल चौर, वनकाली पार्किङ, तिलगंगा व उमाकुण्ड पार्किङय् मेमेगु सवारी साधनया पार्किङ थाय् क्वःछ्यूगु दु ।

पशुपति देगः क्षेत्रय् सुरक्षाया नितिं निगू सिफ्टय् २५०० प्रहरी परिचालन याइगु जूगु दु । देगः क्षेत्रय् सुरक्षाया नितिं सीसीटिभी जडान याःगु दु । सम्भावित खुँ, म्हिचाखुँ व मेमेगु आपराधिक गतिविधियात नियन्त्रण व अनुगमन यायेत उल्लेखनीय ल्याखँय् सादा वसः पुनातःपिं प्रहरी नं परिचालन यायेत्यंगु दु ।

प्रहरीं पशुपतिनाथया दर्शन यायेत वइपिं भक्तजनपिन्त थःगु सामानया सुरक्षाप्रति होशियार जुइत इनाप याःगु दु । छुं नं समस्या जूसा हेल्प डेस्कय् स्वापू तयेत प्रहरीं इनाप याःगु दु ।