बुद्धया जन्मभूमि लुम्बिनीइ प्यसःम्ह भिक्षु अभिषेक यायेगु ज्याझ्वः न्ह्याःगु दु । मायादेवी देगः परिसरय् बौद्ध भिक्षुपिन्सं प्यसम्हेसित चिवर लःल्हानाः श्रामणेर प्रबज्याय् यायेत्यंगु खः ।

अखिल नेपाल भिक्षु महासंघ व थाई भिक्षु महासंघया ग्वसालय् व लुम्बिनी विकास कोष लगायत थीथी संघसंस्थाया सहग्वसालय् कुलपुत्र प्रबाज्या (अल्पकालीन भिक्षु) समारोह न्ह्याःगु खः । ज्याझ्वलय् संघनायक बोधिसेन महास्थवीर, अखिल नेपाल भिक्षु महासंघया नायः महास्थविर धम्म शोवन, थाइ धर्मदूत फरा उपज्याये पवना नापं बौद्ध गुरुपिन्सं अल्पकालीन भिक्षुपिन्त वसः लःल्हाःगु खः ।

उगु ज्याझ्वलय् नेपाःया नितिं थाइल्याण्डया राजदूत सुवापोङ सिरिसोर्नं बुद्धया जन्मभूमि लुम्बिनीइ बुद्धया उपदेश ग्रहण यायेगु तःधंगु अवसर जूगु धयादिल । उगु ज्याझ्वलय् लुम्बिनी विकास कोषया उपाध्यक्ष डा. ल्हार्क्याल लामा (खेन्पो छिमे) बुद्धया शिक्षा छुं ईया निंतिं जक जूसां व्यवहारय् हयेगु ज्याझ्वः बुद्धया जन्मभूमि लुम्बिनीइ जूगु धयादिल ।

अखिल नेपाल भिक्षु महासंघया महासचिव भिक्षु निग्रोधं बुद्धया शिक्षायात व्यवहारय् छ्यलेत भिक्षु, लामा, गुरुपिं माःगुलिं प्रबज्या ज्याझ्वः न्ह्याकाच्वनागु खँ कनादिल।

अल्पकालीन भिक्षुपिन्सं म्हासुगु वसः पुनाः बुद्ध धर्मया १० गू उपदेश पालना यायेमा । आम अनुयायीतय्सं पञ्चसिल व अष्टसिल पालना याइगु जूसां नं अल्पकालीन भिक्षुपिंसं वइगु चैत्र ३ तक पूर्ण रुपं बौद्ध नियमय् च्वनेमा । भिक्षु जुइत २२७ नियम पालना यायेमाः । वंगु फागुन १४ गतेनिसें न्ह्याःगु उगु समारोह फागुन १५ गते यलया अक्षेश्वर महाविहारय् सँ चाःगु खः । मंगलबाः म्हासुगु वसः पुनेत योग्य जुयादीपिंत वसः लःल्हाःगु खः ।

लुम्बिनी विकास काेषया सदस्य सचिव सानुराजा शाक्यं अल्पकालीन भिक्षु दयेकेगु ज्यां बुद्ध शिक्षा व बुद्ध धर्मया प्रचारय् ग्वाहालि जुइगु खँ कनादिल।

२०११ सालय् द्वछि मनूत, २०१५ स १,११२, २०१९ स १,११९, २०२३ स न्याम्ह व २०२४ स १,२५० मनूत प्रबजित जूगु खः । ज्याझ्वलय् लुम्बिनी विकास कोषया सदस्य सचिव शाक्य, कार्यकारी दुजःपिं श्याम रोक्का, राजेश शाक्य, लुम्बिनी बौद्ध विश्वविद्यालयया कुलपति सुवर्णलाल बज्राचार्य, शाही थाइ विहार लुम्बिनीया मू भिक्षु सुफोथया उपस्थिति दुगु खः ।