देँय्दसं माघ पुन्हि अर्थात सिल्ला पुन्हि कुन्हु बाैद्धमार्गीतयेसं आयुसँस्कार परित्याग दिवस हनाच्वंगु दु । भगवान गौतम बुद्धं थःगु आयु स्वला लिपा सिधइगु घोषणा याःगु दिं कथं थुगु दिवस हनाच्वंगु खः । भगवान बुद्ध स्वलालिपा बैशाख पुन्हिया दिनय् मदुगु खःसा उगु दिनयात महापरिनिर्वाण जूगु दिं कथं हनेगु नापं जन्म जूगु व ज्ञान प्राप्त याःगु कथं बुद्ध जयन्ती हनाच्वंगु दु । थ्व हे झ्वलय् येँया बसन्तपुरय् च्वंगु श्रीखण्ड तरुमुल महाविहार, सिखँमूबहाया ग्वसालय् बुद्धया मूर्तिनापं शाेभायात्रा पिकाःगु दु ।
यात्रा लिपा ग्वसाः ग्वःगु ज्याझ्वलय् येँ महानगरपालिकाया कार्यवाहक प्रमुख सुनिता डंगोलं बुद्ध परित्याग दिवसयात राष्ट्रिय पर्वया रुपय् हनेमाःगु धयादीगु दु । वय्कलं येँ महानगरपालिकां थुकि फक्व ग्वाहालि यायेगु बचं बियादिल ।
बुद्धया जीवन संस्कार परित्याग उत्सव थेरवाद विहारय् जक मखुसे महायान व वज्रयान विहारय् नं हनाच्वंगु खँ न्यनेमदुगु श्रीखण्ड तरुमुल महाविहार संरक्षण व संचालन समितिया नायः ई. दिल्लीरत्न शाक्यं न्ह्यथनादिल । वय्कलं थुगु दिवसया दार्शनिक, ऐतिहासिक व सांस्कृतिक पक्ष लगायत थीथी दृष्टिकोणं अध्ययन व अनुसन्धान यायेमाःगु खँय् बः बियादिसें थुगु दिवसया महत्वयात नालाः सरकारी बिदा घोषणा यायेमाःगु बिचाः प्वंकादिल ।