पाथीभाराय् केबुलकार निर्माणया विरोध यानाच्वंगु प्यंगू विरोध समितिं वार्ताया नितिं मन्त्रीस्तरीय समिति गठन यायेत सरकारयात माग याःगु दु । मुक्कुमलुङ संरक्षण संयुक्त संघर्ष समिति संयोजक श्रीप्रसाद लिम्बु, पाथिभरा केबुलकार उन्मूलन संयुक्त संघर्ष समिति संयोजक खगेन्द्र फेम्बु, किरात याक्थुङ चुम्लुङ, संघीय समिति संयोजक प्रेम येक्तेन व लिम्बु थरगत संस्था (याक्थुङ सयङ) या संयोजक नन्द कन्दङवां विज्ञप्ति पितब्यूसें थ्व न्ह्यः जूगु सहमति कार्यान्वयन यायेत माग याःगु खः ।

उमिसं न्हापाया वार्ताय् जूगु सहमति कार्यान्वयन मजूगु दावी याःगु दु । थ्वसिबें न्ह्यः माघ २२ गते जूगु वार्ताय् ६ बुँदे सहमति जूगु खः । सहमति कथं सरकारं विरोध प्रदर्शनया झ्वलय् घाःपाः जूपिन्त निःशुल्क वासः यायेगु, माघ २ गते जूगु घटनाया छानविन यानाः कानूनी कारवाही यायेगु, विरोध प्रदर्शनया झ्वलय् हिरासतय् लाःपिन्त बिना शर्त त्वःतेगु प्रक्रिया न्ह्याकेगु धाःगु खः ।

अथे हे केबुलकार स्टेशनय् झिन्हुतक ज्या बन्द यायेगु मौखिक सहमति जूसां नं इमान्दारीपूर्वक कार्यान्वयन मजूगु संघर्ष समितिं न्ह्यथंगु दु । उकिं कर्मचारीस्तरया वार्ता पुचःपाखें समस्या समाधान याये मफइगु जूगुलिं मन्त्रालयस्तरया समिति गठन यायेत नं माग याःगु दु ।

यदि सरकारं वार्ताय् रुचि मक्यंसे मुक्कुमलुङ आन्दोलनयात बेवास्ता यायेत स्वल वा दमनकारी नीति नालाकाल धाःसा आइतबाःनिसें सम्बन्धित संघसंस्था व राजनीतिक दलतय्सं अझ जोरदार आन्दोलनया घोषणा यायेगु ख्याच्वः इमिसं बिउगु दु ।