भगवान गौतम बुद्धं महापरिनिर्वाण जुइगु इ घाेषणा याःगु दिंयात लुमंका माघपुन्हि (सिल्लापुन्हि वा सिपुन्हि)यात आयुसंस्कार परित्याग दिवस कथं शाेभायात्रा जूगु दु । बैशाख पुन्हिकुन्हु महापरिनिर्वाण जुइगु घाेषणा भगवान बुद्धं स्वला न्ह्यः हे याःगु बाैद्ध ग्रन्थय् उल्लेख यानातःगु दु । जीवन त्याग घाेषणा याःगु दिं कथं बौद्ध जगतय् थाैंया तःधंगु महत्व दु ।

येँया बसन्तपुरय् च्वंगु श्रीखण्ड तरुमुल महाविहार, सिखँम्हुबहालय् वंगु दँनिसें सिल्लापुन्हियात आयुसंस्कार परित्याग दिवस कथं हना वयाच्वंगु दु । बुद्धया मूर्तियात गाडिइ तयाः बसन्तपुरं न्ह्याःगु सांस्कृतिक जुलुसया संयोजन ई. दिल्लीरत्न शाक्यं यानादीगु खः । बसन्तपुर, चिकंमुगः, जैसिदेगः, ज्याबहाः, लगं, ब्रम्हत्वाः, ह्यूमत, कोहिति, भीमसेनस्थान, मरुटोल, प्याफल, यटखा, नरदेवी, असं, वंघ, मं जुया बसन्तपुरय् समापन ज्याझ्वः जूगु खः । बज्राचार्य, शाक्य गुरुजुपिं, थीथी बौद्ध विहारया उपासक उपासिकापिं नापं थीथी खलपुचः पाखें द्वलंद्वः मनूतय्सं ब्वति काःगु खः ।

हलिंया शान्ति नायक गौतम बुद्धं २९ दँया उमेरय् गृह त्याग यानाः ३५ दँया बैशय् बोधिज्ञान प्राप्त याना ८० दँया बैशय् महापरिनिर्वाण प्राप्त याःगु खः ।