अखिल नेपाल फुटबल संघ (एन्फा)या ग्वसालय् जुइगु अन्तर्राष्ट्रिय मिसा फुटबल कासा कन्हे सोमवाःनिसें सुरु जुइत्यंगु दु । धेंधेंबल्लाःया नितिं नेपाली टिमया तयारी पूवंगु प्रशिक्षक व कप्तानं धाःगु दु ।

कासाया फुक्क तयारी पूवंगु नेपाःया मू प्रशिक्षक राजेन्द्र तामाङं जानकारी ब्यूगु दु । कप्तान एन्जेला तुम्बापो सुब्बां थ्व कासा नेपाःया नितिं बांलाःगु अवसर जूगु धयादिल । क्याप्टेन एन्जेलां टिमवर्क बांलाःगु जूगुलिं खँ ल्हायेगु स्वयां बांलाक म्हितेमाःगु धयादिल ।

नेपालं न्हापांगु कासा सोमवाः किर्गिस्तानलिसे म्हितीगु जूगु दु । दशरथ रंगशालाय् सनिलया ६ ता इलय् थूगु कासा सुरु जुइ । थ्व न्ह्यः २ ता इलय् म्यानमार व लेबनान दथुइ कासा जुइत्यंगु दु ।

६ दँ न्ह्यः किर्गिस्ताननाप जूगु कासाय् नेपालं ८–२ गोलं त्याकूगु खः । विश्वकपय् नेपालं म्यानमार नाप आःतक स्वंगु कासा म्हितुगु व छगु नं त्याके मफुनि । घरेलु मैदानय् दर्शक हाैसलां बांलाःगु प्रदर्शन यायेगु आज्जु दूगु प्रशिक्षकं न्ह्यथनादिल ।

अथे हे म्यानमार, लेबनान, किर्गिस्तानया प्रशिक्षक व कप्तानतय्सं नं थुगु कासाय् म्हितेखंगुलिं लसता प्वंकूसें थःपिंसं बांलाःगु प्रदर्शन यायेगु खँ धाःगु दु ।