नेपाल सुपर लिग (एनएसएल) फुटबलया स्वक्वःगु संस्करणया चिधंगु लिलाम ज्याझ्वलय् शनिबाः ८ म्ह कासामिं दकलय् अप्वः बोलपत्र काःगु दु । ए वर्गया कासामिपिं सुमित श्रेष्ठ, मणिकुमार लामा, दिनेश हेन्जन, पासाङ लामा, आशीष गुरुङ, अभिषेक लिम्बु, गिलेस्पी जंग कार्की व सन्तोष खत्रीयात दकले अप्वः ४ लख दामय् मीज्या जूगु दु ।

थुकी मध्ये काठमाडौंं लकी ड्रपाखें दिनेश व गिलेस्पी जंगयात न्यायेत ताःलाःगु खःसा चितवनं अभिषेक व सुमितयात न्याःगु खः । अथे हे मणि ललितपुर, आशीष झापां लक्की ड्रपाखें काःगु खः । पासाङया निंतिं धनगढीं जक अप्वः ल्याखय् ४ लख तका बोलि तःगु खः ।

ए श्रेणीया कासामिपिनिगु भाः २ लख निसें अधिकतम ४ लख तका तयातःगु खः । ‘क’ वर्गया भरत खवास, विकेश कुथु, दीप कार्की व विशाल सुनार व ‘बी’ वर्गया नवयुग श्रेष्ठ धाःसा बिक्री मजूल ।

ए श्रेणीपाखें मीगु मेपिं कासामि विवेक पौडेल, सुरज ठकुरी व प्रदीप लामा दु । बी श्रेणीया कासामिपिनिगु भाः १ लख ५० द्व निसें निगू लख तका तःगु खः ।