हायर ग्राउण्ड नेपालं थुगुसी नं ५ के फन रन/वाक इभेन्टया ग्वसाः ग्वयेगु घोषणा याःगु दु । २०२५ मार्च २२ शनिवाः सनिलया ६ः३० ता इलय् सेन्ट जेभियर स्कूल, जावलाख्यया खेलकुद मैदानय् जुइगु उगु ज्याझ्वलय् २००० स्वयां अप्वः सहभागी व सामुदायिक स्वयंसेवकतय्सं ब्वति काइगु ग्वसाखलकं धुकुमां याःगु दु ।

थुगुसी ५ किलोमिटर फन रनय् उमेर वा लिङ्गया ल्याखं मस्वसे सकसितं ब्वति कायेफइगु जूगु दुसा थुकी ब्वति काःपिन्त एकता व समावेशिताया भावनाय् ब्वाँय् वनेगु वा न्यासि वनेगु निंतिं प्रोत्साहित याःगु दु । थुगु ज्याझ्वलय् ह्विलचियर रेस व थीथी न्ह्यइपूगु जुम्बा प्याखं, मस्तय्गु म्हितेगु थाय्, फेस पेन्टिङ, व मिसा उद्यमीतय्सं चलेयाइगु स्टल, नापं ब्लाइण्ड रक्स संस्थाया सांगितिक कन्सर्ट नं जुइत्यंगु दु ।

ज्याझ्वलय् ब्वति कायेगु शुल्क ५०० तका तयातःगु दु । ब्वतिकाःपिंत टिशर्ट, सहभागिताया पदक, व लन्चया व्यवस्था दूगु ग्वसाखलकं न्ह्यथंगु दु ।

सन् २०१५ निसें दँय्दसं न्ह्यानाच्वंगु थुगु फन रन ज्याझ्वलय् ७ द्व स्वयां अप्वः ब्वति काःपिं दुसा थुकी थीथी पृष्ठभूमिया ४ द्व स्वयां अप्वः मिसात नं दुथ्याः । ज्याझ्वलय् ब्वति कायेत फन रनया आधिकारिक वेबसाइट (funrunnepal.org/register) पाखें अनलाइन नां दर्ता यायेत ग्वसाखलकं इनाप तकं याःगु दु ।