‘पुर्खाया पौरख, नेपामिया गौरव’ धैगु नारा नापं सांस्कृतिक व मनोरञ्जनात्मक ज्याझ्वः व कासा दुथ्याका थ्व हे फागुन १० गतेनिसें १७ गतेतक येँ महानगर वडा नम्बर १५ या ग्वसालय् ‘स्वयम्भू महोत्सव’ ग्वसाग्वयेत्यनागु वडाध्यक्ष  ईश्वरमान डंगोलं न्ह्यथनादीगु दु । वडाया प्राकृतिक सुन्दरता, धार्मिक, सांस्कृतिक व सामाजिक संरचना, रीतिथिति र परम्परा, देगः, चैत्य, गुम्बा, सतल, विहार व प्राचीन स्मारकया विविध विशेषतायात म्हसिका कथं स्थापित यायेत तकं थूगु महाेत्सवं बः बीगु वयेकःया धापु दु । नापं पर्यटनया सम्भावना प्रवर्धन यायेगु आज्जु ज्वना थुगु महोत्सव ग्वसाः ग्वयेत्यंगु वयेकलं न्ह्यथनादिल ।

बडापाखें उद्यमशीलता व जीवनयापनया निंतिं प्रशिक्षण ब्यूपिं व्यक्ति व संस्थां उत्पादन याःगु सामान, स्थानीय उत्पादन, तरकारी व फलफूल, ऊन व मेमेगु सुकां दयेकूगु वसः व भेषभूषाया प्रवर्धन थूगु महाेत्सवय् यायेत्यंगु दु ।

स्वयम्भूया भुइख्यलय् महोत्सव जुइत्यंगु खःसा भगवान पाउया धर्मचक्र पार्कय् प्रदर्शनी व वडास्तरीय विपद् व्यवस्थापन, खोज उद्धार व पुनःस्थापना प्रदर्शनी जुइगु जूगु दु । महोत्सवय् थ्यंमथ्यं ६० गू स्टल दइ । परम्परागत बाजं, बासिन्दाया जन्मनिसें मृत्युतकया संस्कार सम्बन्धी चित्रकला, संस्कृति व परम्परा सम्बन्धी चित्रकला, बुद्धया जीवनीलिसे सम्बन्धित चित्रकला, हुलाक टिकट व मुद्रा ब्वयेत्यंगु दु ।

महोत्सवय् मौलिक नसाज्वलंया स्टल, स्वास्थ्य परीक्षण, हिदान लगायतया सेवाया स्टल दइ । रञ्जना लिपि च्वयेगु, ख्वाः चित्रकला थेंज्याःगु ज्याखँत महोत्सवया थप आकर्षण जुइगु जानकारी वडाध्यक्ष डंगाेलं बियादीगु दु ।

महोत्सवया गतिविधि व्यवस्थित यायेत कार्यपालिका दुजः मैयालक्ष्मी महर्जनया संयोजकत्वय् सांस्कृतिक ज्याझ्वः उपसमिति, व्यवस्थापन उपसमिति, लसकुस उपसमिति नीस्वंगु दु । थुगु उपसमितिइ कथहं ५२, ३० व १२० म्ह दुजः दु । वडा सदस्य रीता मिजारया संयोजकत्वय् १७ म्ह दुजःया प्रचार उपसमिति, अप्सरा खत्रीया संयोजकत्वय् ३५ म्ह दुजःया सरसफाइ तथा स्टल उपसमिति, अले वडा दुजः विजु श्रेष्ठया संयोजकत्वय् २०० म्हेसिया स्वयंसेवक व शान्ति सुरक्षा व्यवस्थापन उपसमिति नीस्वंगु दु ।