येँ महानगर वडा ल्याः १५ या ग्वसालय् स्थानीय पहिचान व सम्भावनायात प्रवद्र्धन यायेगु ल्याखं छवाःयंकंया स्वयम्भू महोत्सव न्ह्याःगु दु । महोत्सवया उलेज्या येँ मनपा मेयर बलेन्द्र शाहं यानादीगु खः । साहं स्थानीय नसाज्वलंया प्रवर्धन यायेमाःगु आवश्यक जूगु न्ह्यथनादिल । वयेकलं नेपाःया विशेषता धइगु स्थानीय नसाज्वलं, संस्कृति, धर्म, व कला जूगु उल्लेख यानादीगु खः ।

वडा नं १५ या थःगु लागाया प्राकृतिक सौन्दर्य, मानव निर्मित धार्मिक, सांस्कृतिक व सामाजिक संरचना, संस्कार व परम्परा, विहार, मन्दिर, चैत्य, सत्तल नापंया प्राचीन स्मारकयात प्रवर्धन यायेगु उद्देश्यं थुगु महोत्सवया ग्वसाः ग्वःगु खः ।

भुइख्यः चौरय् थ्यंमथ्यं ६० गू स्टललिसें न्ह्याःगु महोत्सवय् वडापाखें उद्यमशीलता व जीवनयापनया बारे तालिम काःपिं व्यक्ति व संस्थातय्सं उत्पादन याःगु सामान, स्थानीय उत्पादन, तरकारी व फलफूल, ऊन व मेमेगु सुकां दयेकूगु वसःया प्रदर्शन याःगु खः । थ्व महोत्सवय् नय् त्वनेया स्टल, स्वास्थ्य परीक्षण, हिदान, रञ्जना लिपि च्वयेगु, ख्वाःपाः चित्रकला, सांस्कृतिक व मनोरञ्जनात्मक ज्याझ्वः, कासाया ज्याझ्वःलिसेंया थप आकर्षण नं दु ।