उपचारय् लापरवाही याःगु धासें मुख्यमन्त्री सतीशकुमार सिंहं जनकपुरय् दर्ता तकं मजूगु मुस्कान अस्पताल तत्काल बन्द यायेत उजँ बियादीगु दु । शुक्रवाः बहनी ११ बजे अस्पताल थ्यंकूम्ह मुख्यमन्त्री सिंहं अस्पताल व्यवस्थापनयात शनिबाः सुथय् ११ बजे तक अस्पताल बन्द यानाः ताःचा लःल्हायेत अस्पताल व्यवस्थापनयात उजँ ब्यूगु खः ।

सर्लाहीया हरिपुर्वा गाउपालिका वडा नम्बर ५ या २५ दँया बबिताकुमारी यादव माघ ११ गते पित्तथैलीया शल्यक्रिया लिपा अझ नं बेहोस जुयाच्वंगु दु । अनलाइन समाचारपाखें थ्व घटना सार्वजनिक जुइधुंकाः मुख्यमन्त्री सिंह बहनी ८ बजे अस्पताल थ्यंकूगु खः । तर, अन संचालक मदुगुलिं लिहां वनेमाःगु खः । बहनी ११ बजे थ्यंबलय् मुख्यमन्त्री सिंहं दर्ता भ्वँ क्यनेत धाःगु खः । दर्ता मान्य मजूगु सीदयेधुंकाः मुख्यमन्त्री सिंहं थन वासः याकाच्वंपिं स्वम्ह ल्वगियात मेगु अस्पतालय् व्यवस्थापन यानाः सुथय् ११ बजे तक अस्पतालय् तालं ग्वयाः वास्तविक केस सरकारयात लःल्हायेत उजँ बियादीगु खः ।

मुख्यमन्त्री सिंहं शल्यक्रिया लिपा गम्भीर अवस्थाय् लाःम्ह बबिताकुमारी यादवयात तत्काल पिने यंकाः उचित वासः यायेत नं निर्देशन बियादीगु दु ।