जनकपुर अन्तर्राष्ट्रिय चलचित्र महोत्सव वइगु फागुन १६ गतेनिसें जनकपुरय् जुइत्यंगु दु। ग्वसाः खलः संवाद फाउण्डेशनं मंगलवाः यलय् छगू पत्रकार सम्मेलन यानाः फाल्गुन १६ निसें १८ तक जनकपुर अन्तर्राष्ट्रिय संकिपा महोत्सवया ग्वसाः ग्वयेगु घोषणा याःगु दु ।

नेपाली संकिपा ख्यःयात अन्तर्राष्ट्रियकरण यायेगु, बजाःयात प्रवर्धन यायेगु, सम्भावना व अवसर मालेगु लिसें संकिपा संस्कृति प्रवर्धन यायेगु आज्जुं थुगु महोत्सव ग्वसाः ग्वयागु जानकारी ग्वसाःखलकं ब्यूगु दु । उगु पत्रकार सम्मेलनय् चलचित्र विकास बोर्डया नायः दिनेश डिसीं मिथिलाया संस्कृति विश्वय् म्हसीकेत जनकपुर अन्तर्राष्ट्रिय चलचित्र महोत्सव महत्वपूर्ण जुइगु विश्वास प्वंकादीगु खः । वय्कलं नेपालय् उत्पादित फुक्क भाषाया संकिपाया लिसें मिथिलायात नं महोत्सवय् दुथ्याकेगु छ्याता बियादीगु खः ।

सम्बद फाउण्डेशनं थुगु महोत्सवय् ११४ स्वयां अप्वः देय्या संकिपा दुथ्याकेगु खँ न्ह्यथंगु दुसा नेपाःया प्यानोरामाय् नेपाःपाखें संकिपा दुथ्याकेगु ल्याः नं अप्वया वनाच्वंगु दु ।