मदनकृष्ण श्रेष्ठ व हरिवंश आचार्य (मह जोडीं) युएसएडया ध्यबा छ्यलाः धर्मविरोधी ज्या याःगु द्वपंया खण्डन याःगु दु । थौं छगू भिडियो सन्देशय् सामाजिक सञ्जायलय् वयाच्वंगु द्वपं मखुगु खँ धयादीगु दु ।

मदनकृष्ण श्रेष्ठं थःपिं विरुद्ध जूगु अनावश्यक प्रचारं थःत दुख जूगु धयादिल । थःपिंसं सकसितं थः हे तायेकागु व थः धयापिंसं हे थज्यागु द्वपं तःगुलिं दुःख जूगु न्ह्यथनादिल । थःपिसं समाजय् चेतना वइकथंया जनचेतनाया ज्याझ्वः जक यानागु वयेकलं न्ह्यथनादिल ।

अथे हे हरिवंश आचार्यं छुं नं धार्मिक सम्प्रदाययात घाः लाइगु ज्या मयानागु स्पष्ट यानादील । सनातन हिन्दू धर्म, बौद्ध धर्म वा मेमेगु धर्मया विरोध मयानागु न्ह्यथनादिल । वयेकलं थःपिंसं यानागु दक्व नाटक व प्याखँ युट्युबय् दूगुलि स्वयेत इनाप यानादीगु दु ।

थःपिन्सं २०५२ सालय् ‘पञ्चायती व्यवस्थाया श्राद्ध’ नांया ज्याझ्वः यानागु व उकी छम्ह पण्डितया चरित्रयात व्यंग्य यानागुलि उकिया छकू कुचा शेयर यानाः सनातन धर्मया विरोध याःगु द्वपं लाःगु धयादिल । थः छम्ह पण्डितया काय् जूगु व व्यंग्य धइगु विद्वान, राजनीतिज्ञ, प्रहरी, डाक्टर, वकिल न्ह्यागु पेशायागु यायेज्यूगु धयादिल । वयेकलं भ्रामक खँय् विश्वास मयायेत तकं इनाप यानादिल ।

थाैकन्हे भाइरल जुइगु व लाइक व भ्यूजया नितिं चिधंगु क्लिप तया यःयःथे प्रचार यायेगु व सामाजिक वैमनस्य व विभाजन हयेगु कुतलय् छुँ छुँ मनुत सक्रिय जुयाच्वंगु खनेदु ।