के–पप ब्याण्डया दुजः भी उर्फ किम तेह्युङयात ‘हलिंया दकलय् ह्याण्डसम मनू’ घोषणा याःगु दु । टेक्नो–स्पोर्टसं थुगुसीया ह्याण्डसम मिजंतय्गु धलः सार्वजनिक याःगु खः । हलिउड स्टार ब्रेड पिट व बलिउड स्टार ऋतिक रोशन थेंज्याःपिं मनोरञ्जन ख्यःयापिंत तकं भीनं लिउने लाकूगु दु । भीया लोकप्रियता नेपाः लगायत हलिंन्यंक दु । जेन-जी पुस्ताया दथुइ वयागु क्रेज तच्व । भी छम्ह म्येहालामि, म्ये च्वमि, व कलाकार नं खः । सन् २०१३ य् बीटीएसय् दुहां वःम्ह भीं ‘स्टिग्मा’ नांया याकः म्ये नं पिथंगु दु ।

थ्व धलखय् निगूगु थासय् हलिउड स्टार ब्रेड पिट दु । निक्वःतकया ओस्कार विजेता पिटयात पीपल पत्रिकां “सेक्सीस्ट म्यान अलाइभ” घोषणा याःगु खः । स्वंगूगु थासय् हलिउडया ब्लकबस्टर व स्वतन्त्र संकिपाय् म्हितूम्ह रोबर्ट प्याटिन्सन दु । प्यंगूगु थासय् क्यानाडाया अभिनेता व मोडल नोआ मिल्स दु ।

न्यागूगु थासय् बलिउडया नांजाःम्ह कलाकार ऋतिक रोशन दु । खुगूगु थासय् नकतिनि जक क्यानाडाया प्रधानमन्त्री पदं राजीनामा ब्यूम्ह जस्टिन ट्रुडो दु । थ्व धलखय् लिउने हलिउडया कलाकार क्रिस इभान्स, हेनरी क्याभिल, टम क्रुज व ब्रेडली कूपर दु । टेक्नो स्पोर्टसं थुगु धलः दँय्दसं पिथना वयाच्वंगु दु ।