येँ महानगरं मंगलवाः सार्वजनिक याःगु ‘न्यायिक समिति : मार्गदर्शन’ सफुतिइ महानगरया मेयर बालेन्द्र शाहया इजलासं ३०६ विवाद समाधानया निंतिं ३३ गू सुनुवाई जूगु उल्लेख यानातःगु दु । सफू कथं थुकिया माध्यमं १७४ गू विवाद समाधान जूगु दुसा ६५ गू विवादयात स्थगित याःगु दु । ६ गू मुद्दाय् समझौता जूगु दु । मेगु विवादत ज्यंके मफुनि ।

थुकथं स्वयेबलय् ८०.०६ प्रतिशत विवाद प्रमुखया इजलासं समाधान याःगु दु । भवन निर्माणया मापदण्डयात कयाः मेयरया इजलासं विवाद सुनुवाई यायेगु व्यवस्था दु । १४१ मध्यस्थताया माध्यमं विवाद समाधान जूगु दु ।

अथे हे उपमेयर सुनिता डंगाेलया नेतृत्वय् दूगु महानगरीय नगर न्यायिक समितिं आःतक ८३ गु सुनुवाई व न्याय ब्यूगु दु । मुक्कं ६०८ विवाद समाधान मध्ये ३२६ विवादया निर्णय व १४१ विवाद मध्यस्थतापाखें समाधान जूगु खः । पुनरावेदन जूगु १३२ गू निर्णयमध्ये १५ गू विवाद पुनरावेदन तहलय् समाधान जूगु खःसा १३ गू न्यायिक समितिया निर्णय पुनरावेदन तहलय् कायम जूगु खः । न्यायिक समितिं याःगु १०६ गू निर्णय कार्यान्वयन जूगु दुसा ८८ गू निर्णय कार्यान्वयन जुइगु प्रक्रियाय् दु । थौंकन्हय् न्यायिक समितिइ १४० गू विवाद विचाराधीन दु ।

महानगरं आःतक ५२,७४० सेवाग्राहीयात निःशुल्क कानूनी सेवा प्रदान याःगु प्रतिवेदनय् उल्लेख दु । चालु आर्थिक दँया थ्व अवधिइ जक ६ द्व ८४७ म्हेसित सेवा ब्यूगु सफुतिइ उल्लेख यानातःगु दु। न्यायिक समितिं निर्णय प्रक्रिया स्वयां मेलमिलाप प्रक्रियाय् बः ब्यूगु दु । मेलमिलाप याये मफइगु विवाद अदालतय् सुनुवाई जुइ । ध्यबाया अभावं न्यायया पहुँच मदुपिं महानगरवासीतय्त महानगरं कानून व्यवसायीपाखें निःशुल्क कानूनी सेवा बियाच्वंगु दु । थुकिया खर्च महानगरं व्यहोरे याइ । थ्व सेवा २०८० चैत्र १८ निसें न्ह्याःगु खः ।

भवन निर्माण अनुमति सम्बन्धी विषयस प्रमुख प्रशासनिक अधिकृतया इजलासं बिचाः याइ । थुकिं आःतक १६ गू विवादय् अन्तिम निर्णय जूगु दु ।