थौं स्वस्थानी व माधवनारायणया व्रत क्वचाःगु दु । सक्वया शालिनदि व हनुमान घाटया त्रिवेणी धामय् म्वः ह्लुया पुजा यानाः भक्तजनपिन्सं विधिपूर्वक व्रत क्वचायेकूगु दु ।

पुस शुक्ल पुन्हिया दिंनिसें माघ शुक्ल पुन्हिया तक स्वस्थानी व माधवनारायण व्रत च्वनेगु याइ । थौं अन्तिम दिनय् व्रत क्वचायेकुपिनि शाली खुसि, गौरीघाट, हनुमान घाटय् भीड जुयाच्वंगु दु । खुसि, पुखु आदि थासय् वने मफुपिन्सं छेँय् हे पुजा यानाः व्रत क्वचायेकूगु दु । थनिंनिसें स्वस्थानी बाखं न्यनेगु व कनेगु ज्या नं क्वचाःगु दु ।

स्कन्द पुराणया केदार खण्डया माघ महात्म्यय् कुमार व अगस्त्य दथुइ जूगु संवाद परम्परागत रुपं स्वस्थानी बाखँया रुपय् कनेगु व न्यनेगु याना वयाच्वंगु दु । थौं भक्तजनतय्सं १०८ जनि, १०८ ग्वय्, १०८ ग्वा, १०८ स्वाँ, १०८ मरि, १०८ जाकि, थीथी कथंया फलफूल, धुँ, मत, प्रसाद, श्रीखण्ड, ह्याउँगु चन्दन, ह्याउँगु रंग, वसः व दाँ छायेगु याइ । माघ महिनाय् भगवान विष्णुयात माधव नारायण धाइगु जूगुलिं स्वस्थानीया नापनापं माधव नारायणया नं व्रत च्वनेगु, पूजा यायेगु याइ । स्वस्थानी भक्तजनपिन्सं माधवनारायणयात नं पूजा याःसा जक थःगु मनोकांक्षा पूवनी धइगु जनविश्वास दु ।

स्वस्थानीया मू भक्तजन मिसापिं खःसा माधवनारायणया मू भक्तजन मिजंत खः । थौं ख्वपया हनुमान घाटय् च्वंगु माधवनारायण देगलं सक्वया शालिनदीइ विशेष यानाः मिजं मस्तय्सं उपवास च्वनाः थ्यंमथ्यं निगू किलोमिटरया धार्मिक यात्रा चाःहिलाः क्वचायेुगु दु ।