संगीत महर्षि नातिकाजी श्रेष्ठया १०० दँ बुन्हिया लसताय् बुधवाः राष्ट्रपति ज्याकुथि शीतल निवासय् जूगु छगू ज्याझ्वलय् राष्ट्रपति रामचन्द्र पौडेलं थीथी व्यक्तित्वपिंत सम्मान यानादीगु दु । नातिकाजी स्मृति समाजया ग्वसालय् जूगु ज्याझ्वलय् राष्ट्रपति पौडेलं कला, साहित्य, संगीतं समाजय् एकता, सहिष्णुता, व समृद्धिया विकासय् योगदान बीगु धयादिल । थ्व सभ्य व सुसंस्कृत समाजया संकेत जूगु वयेकःया धापु दु । संस्कृति, पर्यटन व नागरिक उड्डयन मन्त्री बद्री पाण्डें नातिकाजी शब्द, संगीत व सःया कालातीत त्रिकोण जूगु धयादिल ।

नातिकाजी स्मृति समाजया ग्वसालय् जूगु समारोहय् संगीत प्रवर्द्धक प्रकाश सायामी, लोकगायक बोमबहादुर कार्की, सितारवादक ज्ञानुराधा गोरखाली, गीतकार बुद्धवीर लामा, गायक दिवाकर खड्का, गीतकार किरण केसी, गायिका यशोदा पराजुली व संचार व्यक्तित्व व प्रस्तोता धन लामायात नातिकाजी राष्ट्रिय विशिष्ट संगीत सम्मान प्रदान याःगु दु ।

नातिकाजी राष्ट्रिय संगीत पुरस्कार गायक हिमाल सागर, गायक विन्दु परियार, गीतकार बी पाण्डे, संगीतकःमि आशीष अबिरल, व संगीत संयोजक सम्राट थापायात लःल्हाःगु दु । म्ये रेकर्डिष्ट भोला पौडेल, म्येहालामि डेभिड शंकर, म्येहालामि स्मिता दाहाल, संगीत संयोजक कल्याण सिंहयात नातिकाजी राष्ट्रिय प्रतिभा पुरस्कारं सम्मानित याःगु दु । नातिकाजी राष्ट्रिय शास्त्रीय संगीत पुरस्कार रमेश पोखरेलयात लःल्हाःगु दु । नातिकाजी राष्ट्रिय लोक संगीत पुरस्कार रामप्रसाद अवस्थी, सुष्मा शाही ठकुरी व कृष्ण विकयात लःल्हाःगु दु ।

साहित्यकार विमल भौकाजी, संगीत साधना प्रतिष्ठान इटहरीया अर्जुन केसी, संगीत साधक अमीर सुनार व सन्तबहादुर गिरीयात नातिकाजी राष्ट्रिय योगदान पुरस्कारं सम्मानित याःगु दु । नातिकाजी राष्ट्रिय कला पत्रकारिता सिरपाः कला पत्रकार सुकृत नेपाल व सुशील अर्यालयात लःल्हाःगु दु ।