बिहीबाः हलिंया दकले प्रदूषित शहरया धलखय् येँ निगूगु थासय् लाःगु दु । हलिंन्यंकया वायु गुणस्तरया अवस्था ट्रयाक याइगु पोर्टल आइक्यू एयरया कथं सुथय् ११ः३० ता इलय् येँया एक्यूआई (वायु स्वच्छता सूचकांक) १८३ थ्यंगु खः । आइक्यू एयरया कथं पाकिस्तानया कराची हलिंया दकलय् अप्वः प्रदूषित शहरया धलखय् न्हापांगु थासय् लाःगु दु । चीनया वुहान नेपाः लिपा स्वंगूगु थासय् दुसा पाकिस्तानया लाहौर प्यंगूगु थासय् दु ।

डिजास्टर पोर्टलं नेपाःया थीथी शहरया वायुया गुणस्तर अत्यन्त चिन्ताजनक जूगु क्यंगु दु । पोर्टलया कथं बुधवाः सुथय् ७ः५३ ता इलय् दाङया एक्यूआई २६०.३६ थ्यंगु खः । थौं सुथय् ११ बजे पोखराया एक्यूआई २४४.२१ थ्यंगु खः । चितवनया भरतपुरय् सुथसिया १०ः४३ ता इलय् १६५.०८ व येँया शंखापार्कय् १०ः५९ ता इलय् १६१.८४ थ्यंगु खः । डिजास्टर पोर्टलया कथं धनगढी, यलया भैंसेपाटी, ख्वप, येँया रत्नपार्कय् वायु गुणस्तर बांमलाःगु दु ।