उपप्रधान व सहरी विकासमन्त्री प्रकाशमान सिंहं ज्या याइपिन्त गफ याइपिंलिसे तुलना यायेमज्यूगु धयादीगु दु । शुक्रवाः येँ महानगरपालिका २९ वडा भवन उलेज्या यानादिगु खः । संविधान जारी यायेगु तकं छुं मखु धकाः धाइगु मन्त्री सिंहं न्ह्यथनादिल । थन यायेगु तःधंगु ज्या छु जुइ ? वय्कलं न्यनादिल । राजनीतिइ सेवा याइपिं व ठगे जुइपिनि मूल्यांकन यायेमाःगु न्ह्यथनादिल ।

उपप्रधानमन्त्री सिंहं नागरिकया इच्छा कथं स्थिर सरकारया निंतिं कांग्रेस–एमाले गठबन्धन जूगु, उकथं हे ज्या जुयाच्वंगु, अर्थतन्त्रयात हाकनं थासय् हयेगु व अझ गतिशील यायेगु निंतिं अध्यादेश हयेत्यनागु तकं धयादील । अथे हे वय्कलं मछ्यःगु सार्वजनिक जग्गा जनताया निंतिं जुइमाःगु व स्थानीय उपयोगया निंतिं उपलब्ध जुइमाःगु खँय् बः बियादिसें उकिया निंतिं सरकारं ज्या यानाच्वनागु खँ कनादिल । उपप्रधानमन्त्री सिंहं थम्हं प्रतिनिधित्व यानागु येँ क्षेत्र नं १ या सतक व सामुदायिक ब्वनेकुथिया पूर्वाधारय् आपालं ज्या जूगु न्ह्यथनादिसें आः स्वास्थ्य लागाय् केन्द्रित जुइगु प्रतिबद्धता प्वंकादीगु खः ।