येंया हनुमानढोका दरबार स्क्वायरय् जापानया समृद्ध तजिलजि, परम्परागत नखः, प्राकृतिक सौन्दर्य व ऐतिहासिक सम्पदायात झल्कायेगु विशेष किपा प्रदर्शनी जूगु दु। राष्ट्रिय फोटोपत्रकार समूह नेपाःया ग्वसालय् यें महानगरया कार्यवाहक मेयर सुनिता डंगोलजुया सहभागिताय् थ्व प्रदर्शनी जूगु खः।

थ्व अवसरय् नायः डंगोलं थ्व प्रदर्शनीं नेपाः व जापान दथुइ सांस्कृतिक स्वापू क्वातुकेत ग्वाहालि जुइगु धयादिल। फोटोग्राफीं थीथी देय्या संस्कृति, इतिहास, प्रकृति व दैनिक जीवनयात प्रभावकारी रूपं लँपु बिइगु धयात वय्कलं अन्तर्राष्ट्रिय सांस्कृतिक आदानप्रदानया पहलयात लसकुस यानादिल।

एनएफपीजे नेपाःया नायः प्रदिपराज ओन्टां किपा छगू देय्या पर्यटन, तजिलजि, कला, सम्पदा व जीवनशैलीयात अन्तर्राष्ट्रिय दर्शकतय्त प्रचार यायेगु शक्तिशाली माध्यमया जुइ धयादिल।

प्रदर्शनीइ जापानया तोयामा प्रान्तया विशेष यानाः ऐतिहासिक नगर यात्सुओ व शिन्मिनातोया किपात तयातःगु दु। थुकिं परम्परागत नखःचखः, स्थानीय जीवनशैली, वास्तुकला व तातेयामा पर्वत श्रृंखलां घेरेयाःगु प्राकृतिक सौन्दर्यया चित्रण यानातःगु दु।

प्रदर्शनीया छगू मू आकर्षण धइगु दँय्दसं सेप्टेम्बर १ निसें ३ तक जुइगु यात्सुओया काजे नो बोन नखःया किपा खः। करीब ३०० दँया अप्वः इतिहास दुगु थ्व नखः जापानया नांजाःगु परम्परागत शरद ऋतुया नखःमध्ये छगू खः।