मिसा टि–२० त्रिकोणीय सिरिजय् घरेलु टिम नेपालं खुगू हे कासाय् बूगु दु । थौं शुक्रवाः जूगु खुक्वःगु व लिपांगु कासाय् थाइल्याण्डं नेपाःयात ७ विकेटं बुकूगु दु । किपुया त्रिभुवन विश्वविद्यालय मैदानय् जूगु कासाय् थाइल्याण्डं १७ ओभरय् ३ विकेट तंका नेपालं ब्यूगु ८२ रनया लक्ष्य पूवंकूगु खः । थ्वसिबें न्ह्यः न्हापां ब्याटिङ याःगु नेपालं ७ विकेटया क्षतिइ ८१ रन जक दयेकेफत । नेपाःया नितिं ओपनर सम्झना खड्कां १७ रन दयेकूगु खः ।

थुगु सिरिजय् बांमलाःगु प्रदर्शन याःगु नेपालं थाइल्याण्ड व नेदरल्यान्ड निगुलिं टिमलिसे म्हितूगु स्वंगू हे कासाय् पराजित जूगु दु । थ्व सिरिजय् नेपाःया उपलब्धि धइगु नेदरल्याण्ड विरुद्ध पूजा महतोया अर्धशतक व सीता राणामगरं छगू हे कासाय् नेदरल्याण्ड विरुद्ध ५ विकेट काःगु हे खः ।

नेपाःया कासा

न्हापांगु कासा – नेदरल्याण्ड्सलिसे २० रनं बुत

निगूगु कासा – थाइल्याण्डलिसे ४ विकेटं बुत

स्वंगूगु कासा – नेदरल्याण्ड्सलिसे १५ रनं बुत

प्यंगूगु कासा – थाइल्याण्डलिसे ५ रनं बुत

न्यागूगु कासा – नेदरल्यान्डलिसे १० विकेटं बुत

खुक्वःगु कासा – थाइल्याण्डनाप ७ विकेटं बुत