शनिवाः पोखरा प्रदर्शनी केन्द्रय् भिजिट नेपाल दँया उलेज्याया झ्वलय् हाइड्रोजनं जाःगु बेलुन च्याना धाःपा जूपिं अर्थमन्त्री विष्णु पौडेल व पोखरा महानगरया मेयर धनराज आचार्यया स्वास्थ्य सुधाराेन्मुख धाःगु दु । संक्रमण जुइफूगुलिं निम्हसित नापलायेगु धाःसा अस्पतालं बन्द याःगु दु । निम्हसितं किपुया बर्न अस्पतालय् वासः याकाच्वंगु दु ।

थुखे पोखरा भ्रमण वर्षया झ्वलय् अर्थमन्त्री पौडेल व मेयर आचार्य बेलुन विष्फोट जुयाः घाःपाः जूगु घटनाया छानविन यायेत ८ म्हेसिया समिति नीस्वंगु दु । गृहमन्त्री रमेश लेखकं मन्त्रीस्तरीय निर्णयपाखें आइतबाः सुथय् कास्कीया प्रमुख जिल्ला अधिकारी भरतमणि पाण्डेया संयोजकत्वय् समिति गठन याःगु खः ।

समितिइ पोखरा महानगरया प्रमुख प्रशासकीय अधिकृत सुवराज चौलागाईं, कास्की प्रहरी प्रमुख प्रहरी उपरीक्षक श्यामबाबु ओलि, सशस्त्र प्रहरीया २४ नम्बर गण हेटक्वाटर प्रमुख सशस्त्र प्रहरी उपरीक्षक सुर्यप्रसाद तिमिल्सिना, राष्ट्रिय अनुसन्धान जिल्ला ज्याकु उपअनुसन्धान निर्देशक सुरेश कुमार तिवारी दुजः कथं दु । समितिया दुजः छ्याञ्जे कास्कीया सहायक प्रमुख जिल्ला अधिकारी गंगाबहादुर क्षेत्री तःगु दु ।

गृहमन्त्री लेखकया सचिवालयं समितिइ विस्फोटक पदार्थ विज्ञ नं दुथ्याकेगु खँ न्ह्यथंगु दु । समितिं आइतबाःनिसें ज्या न्ह्याकीगु धाःगु दु । गृह मन्त्रालयं घटनाया विस्तृत छानविन पेश यायेत व भविष्यय् अज्याःगु घटनाया इलय् नालेमाःगु सावधानी उपाय सहितया प्रतिवेदन पेश यायेत १५ न्हुया ई ब्यूगु दु ।