प्रधानमन्त्री केपी ओलीया तिरीमयेजु राधिका शाक्यया आत्मकथा ‘करुणा’ थः जहानया ल्हातं हे पितब्वज्या जूगु दु । शनिवाः छगू ज्याझ्वलय् प्रधानमन्त्री ओली, च्वमि शाक्य, नेकपा एमालेया उपमहासचिव प्रदीप ज्ञवाली, साहित्यकार अमर न्यौपाने, म्येहालामि अनी चोइङ डोल्मां थूगु आत्मकथा पितब्यूगु खः ।

प्रधानमन्त्री ओली व मय्जु शाक्यया इहिपा जूगु ३७ दँ क्यंगु लसताय् पाणिनी बुक्स प्रा.लिं. पितब्यूगु खः । च्वमि शाक्यं आत्मकथाय् थःगु हे दृष्टिकोण, अनुभव, व भावनाया लिसें प्रधानमन्त्री ओलीया संघर्ष, कठिनाइ, सफलता, समाजसेवाया खँ दुथ्याकातयागु खँ कनादिल । सफुतिइ शाक्यया मचाबलय्, अध्ययन, जागिर, जीवनया उतारचढावया विवरणया लिसें नेता ओलीलिसे इहिपा लिपाया आपालं प्रकरणया विवरण बियातःगु दु ।

वय्कलं प्रधानमन्त्री ओली थें मेहनती मनू संसारय् सुं नं मदुगु धाःसें प्रशंसा यानादिल । वय्कः थें सक्रिय मनु सायद नेपालय् जक मखु, विश्वय् नं मदु धाःसें ३७ वर्ष नापं च्वना थम्ह उलि धायेफूगु धयादिल । अथेहे प्रधानमन्त्री ओली नं थः छम्ह साक्षी जुयागुलिं च्वमि शाक्य च्वयादीगु खँ दक्व हे यथार्थ जूगु व उपन्यास, बाखँ वा काल्पनिक मजूगु न्ह्यथनादिल ।