ह्याउँगु पाण्डाया बारे जानकारी बीत तयार यानातःगु सफू ‘नेपालमा हाब्रे’ सार्वजनिक जूगु दु । गिरिराज बास्कोटां सम्पादन यानादीगु उगु सफू शनिवाः इलाम प्रमुख जिल्ला अधिकारी कल्पना श्रेष्ठ नापं इलाम जिल्ला समन्वय समितिया प्रमुख जयप्रकाश राई, कोशी प्रदेश वन मन्त्रालयया सचिव विशाल घिमिरे, रेडपाण्डा नेटवर्क नेपालया निर्देशक आङफुरी शेर्पा, वन तथा भूमि विभागया उपनिर्देशक धनन्जय रेग्मीं पिसं सार्वजनिक यानादीगु खः ।

उगु सफू रेडपाण्डा नेटवर्क व दीप ज्योति युथ क्लबया मंकाः प्रकाशनय् पिदंगु खः । थुगु सफुतिइ नेपालय् खनेदूगु प्रजातिया अवस्था, संरक्षणया हाथ्या, पर्यटन, व थीथी संरक्षणया सन्दर्भयात कयाः १६ गू च्वसु दुथ्याकातःगु दु । उगु सफुतिइ मोहन मैनाली, यादव उप्रेती, संग्राम कार्की, मुकेश पोखरेल, युवराज गौतम, गोविन्द पोखरेल, सीताराम गुरागाईं, विप्लव भट्टराई, भीम चापागाईं, आनन्द गौतम, सरोज शर्मा, अलिना दियाली नापंया च्वसुत दुथ्याकातःगु दु ।